मिळालेल्या माहितीनुसार, मुंबईतील लालबाग काळाचौकी परिसरात मनिषा यादव हिला सोनू बराय याने रस्त्यात बेदम मारहाण करून तिच्यावर चाकूने हल्ला केला. हल्ल्यानंतर स्वतःचा जीव वाचवण्यासाठी मनिषा जवळच असलेल्या आस्था नर्सिग होममध्ये गेली. मात्र सोनू याने नर्सिंग होममध्ये घुसून तिच्यावर जीवघेणा हल्ला केला आणि नंतर स्वतःचाही गळा चिरला. या घटनेनंतर या दोघांना तात्काळ केईएम रुग्णालयात पाठवण्यात आलं होतं. परंतु तिथे तपासून डॉक्टरांनी सोनू बराय याला मृत घोषित केले.

Satara Crime : ‘शवविच्छेदन अहवाल बदलण्यासाठी वारंवार दबाव’, मृत डॉक्टरच्या नातेवाईकांचा मोठा आरोप; ‘त्या’ खासदाराचा सतत फोन

दुसरीकडे, मनिषा यादव हिच्यावर नंतर जे जे रुग्णालयात उपचार करण्यात येत होते. चाकूने केलेल्या हल्ल्यात गंभीर जखमी झालेल्या मनिषाच्या शरीरातून मोठ्या प्रमाणात रक्तस्त्राव झाला होता. त्यामुळे तिची प्रकृती अत्यवस्थ होती. सायंकाळच्या सुमारास दुर्दैवाने तिने प्राण गमावले.

कोणत्या कारणातून केला जीवघेणा हल्ला?

आंबेवाडी येथे राहणारा सोनू बराय या 24 वर्षीय तरुणाचे याच परिसरात राहणाऱ्या मनिषासोबत प्रेमसंबंध होते. मात्र आठ दिवसांपूर्वी मनिषाचे अन्य कुणासोबत अफेयर असल्याचा संशयावरून दोघांमध्ये ब्रेकअप झाल्याचं सांगण्यात येत आहे. ब्रेकअप झाल्यानंतर सोनू मानसिक तणावात होता. याच तणावात असताना त्याने सकाळी मनिषाला भेटायला बोलावून तिच्यासोबत वाद घातला आणि नंतर तिच्यावर चाकूने वार केले. तसंच स्वतःचाही गळा चिरून घेतला.

दरम्यान, या घटनेनंतर काळाचौकी पोलिस आणि उपायुक्त घटनास्थळी पोहोचले होते. पोलिसांकडून याप्रकरणी अधिक तपास केला जात आहे.