फटाके विक्रीसाठी महापालिकेची परवानगी तसेच पोलिस आणि अग्निशमन दलाच्या ना हरकत प्रमाणपत्राची आवश्यकता असते. असे असतानाही मुंबईत ठिकठिकाणी विशेषतः गजबजलेल्या झोपडपट्ट्याच्या परिसरात रस्त्याच्या कडेला स्टॉल लावून फटक्यांची विक्री केली जात आहे. या बेकायदा विक्रेत्यांवर पोलिसांनी कारवाई सुरू केली आहे. कुर्ला स्थानक रोड परिसरात वर्दळीच्या परिसरात एकजण स्टॉल लावून उघडपणे फटाक्यांची विक्री करीत होता. कुर्ला पोलिसांनी रमेश गुप्ता याच्या या स्टॉलवर छापा टाकून १५ ते २० हजारांचे फटाके हस्तगत केले. याच परिसरात आणखी दोन फेरीवाल्यांनी फटाके घेऊन रस्त्याच्या कडेला ठाण मांडल्याचे दिसून येताच या दोघांवरही पोलिसांनी कारवाई केली. आयुक्तांच्या आदेशाचे उल्लंघन केल्याप्रकरणी राकेश गुप्ता आणि सहमूद शेख यांच्यावर गुन्हा दाखल करण्यात आला.

घाटकोपर पूर्वेकडील पंतनगर परिसरात गजबजलेल्या गौरीशंकर वाडीतील सार्वजनिक ठिकाणी फटक्यांचा स्टॉल लावण्यात आल्याचे गस्तीदरम्यान पोलिसांच्या लक्षात आले. पोलिसांनी स्टॉलधारकाला ताब्यात घेऊन त्याच्याकडून फटाके जप्त करण्यात आले. जोगेश्वरी रेल्वे स्थानकानजीक असलेल्या बाजारात कायमची गर्दी असते. अशा ठिकाणी अग्निसुरक्षेची कोणतीही सावधगिरी न बाळगता स्टॉल लावून फटाक्यांची विक्री करणाऱ्या अखलाक पटेल याच्याविरुद्ध जोगेश्वरी पोलिसांनी गुन्हा दाखल केला.

विक्रीस ठेवण्यात आलेले वेगवेगळ्या प्रकारचे फटाके त्याच्याकडून ताब्यात घेण्यात आले. सांताक्रूझ पूर्वेकडील वाकोला येथील आर. के. रुग्णालयासमोरील फटाक्यांच्या स्टॉलवर वाकोला पोलिसांनी कारवाई केली. आयुक्तांचा आदेश पायदळी तुडवत रस्त्याच्या कडेला फटाकेविक्री करणाऱ्या ओमप्रकाश वर्मा याच्यावरही गुन्हा दाखल करण्यात आला.

कोणत्या कलमांतर्गत गुन्हा ?
फटाके म्हणजे ज्वालाग्राही स्फोटके असल्याने बारीपदार्थ अधिनियम १९८४ अंतर्गत दोषी विक्रेत्यावर गुन्हा दाखल होतो. गर्दीच्या तसेच, सार्वजनिक ठिकाणी उघड्यावर फटाकेविक्री करताना दुर्घटना घडल्यास कोणाच्याही जिवावर बेतू शकते. त्यामुळे विक्रेत्याविरुद्ध भारतीय न्याय संहिता कलम १२५ लागू केले जाते. त्याचबरोबर महापालिका आणि पोलिस आयुक्तांनीही अशाप्रकारे फटाके विक्री करण्यास मनाई केली आहे. असे असतानाही फटाके विकले जात असल्याने लोकसेवकाने प्रसूत केलेल्या आदेशाचे पालन न केल्याने भारतीय न्याय संहिता कलम २२३ अंतर्गत कारवाई केली जाते.