पोलिसांनी दिलेल्या माहितीनुसार, शुक्रवारी १० ऑक्टोबरला इंदापुरातील भिगवण गावच्या हद्दीत पुणे सोलापूर महामार्गावरील ‘विकास इंजिनिअरिंग हार्डवेअर’ दुकानासमोर पहाटे सुमारे सव्वा तीन वाजता एक महिला गाडीची वाट पाहत उभी राहिली होती. यावेळी जाक्या चव्हाण याने महिलेला “ताई, इथून एसटी मिळणार नाही, तुम्ही माझ्या गाडीवर बसा” असे सांगून तिचा विश्वास संपादन केला.
Pune Crime: भल्यापहाटे महिलेचा जळालेला मृतदेह, पुण्यातील त्या हत्येचा उलगडा; धक्कादायक कारण समोर
आरोपीने तिला पुण्याच्या दिशेने नेऊन मळद (ता.दौंड) गावच्या हद्दीत रेल्वे ब्रिजजवळ झाडाझुडपात ओढून नेऊन शिवीगाळ करत जीवे ठार मारण्याची धमकी देत तिच्यावर बलात्कार केला. त्यानंतर पीडीत महिलेने भिगवण पोलीस ठाण्यात अज्ञात व्यक्तीच्या विरोधात तक्रार दाखल केली होती.

घटनेचे गांभीर्य लक्षात घेऊन पुणे जिल्हा ग्रामीण पोलीस अधीक्षक संदीपसिंह गिल यांनी विशेष पथके स्थापन करून तपास सुरू केला. तपासादरम्यान आरोपीचा शोध घेण्यासाठी १०० हून अधिक सीसीटीव्ही फुटेज तपासण्यात आले, तसेच संशयिताचे रेखाचित्र तयार करण्यात आले. गोपनीय सूत्रांच्या मदतीने संशयित चव्हाण यास ताब्यात घेण्यात आले. चौकशीत त्याने गुन्ह्याची कबुली दिली आहे.

सदरची कामगिरी अपर पोलीस अधीक्षक गणेश बिरादार, बारामतीचे उपविभागीय पोलीस अधिकारी डॉ. सुदर्शन राठोड, दौंडचे पोलीस विभागीय अधिकारी बापू दडस पाटील, स्थानिक गुन्हे शाखेचे वरिष्ठ पोलीस निरीक्षक अविनाश शिळीमकर, दौंडचे पोलीस निरीक्षक गोपाळ पवार भिगवण पोलीस स्टेशनचे सहायक पोलीस निरीक्षक विनोद महांगडे, उपनिरीक्षक अमित पाटील, अंमलदार महेश उगले, सचिन पवार, संतोष मखरे, तसेच स्थानिक गुन्हे शाखेचे सहायक पोलीस निरीक्षक कुलदीप संपकाळ व दौंड पोलीस स्टेशनचे पोलीस उपनिरीक्षक रूपेश कदम, अंमलदार सुभाष राऊत, नितीन बोराडे, अमीर शेख यांनी केली आहे. पुढील तपास महिला पोलीस उपनिरीक्षक दिपाली गायकवाड करीत आहेत.