मिळालेल्या माहितीनुसार, शुक्रवारी सकाळी कोल्हापूर जिल्ह्यातील हातकणंगले येथून कोणालाही न सांगता बाहेर पडलेला नऊ वर्षांचा मुलगा कोल्हापूर शहराकडे आला होता. दिसेल त्या वाहनांना हात करून तो दाभोळकर कॉर्नरपर्यंत पोहोचला होता. गर्दीत तो काही वेळानंतर भेदरला आणि एका कोपऱ्यात थांबून रडू लागला. याच दरम्यान गस्त घालत असलेल्या शाहूपुरी पोलिसांनी त्याला पाहिले आणि तात्काळ जवळ जाऊन विचारपूस केली.

न घाबरता मुलाने दिली सगळ्या प्रश्नांची उत्तरं..
पोलिसांनी मुलाला विश्वासात घेऊन केलेल्या चौकशीत मुलाने स्वतःचे गाव हातकणंगले एवढेच सांगितले. त्याच्या हातात स्मार्ट वॉच आणि खिशात चार्जर असल्याने तो तंत्रज्ञानाशी परिचित असल्याचे पोलिसांच्या लक्षात आले. शांतपणे प्रत्येक प्रश्नाचे उत्तर देणारा हा चिमुरडा अत्यंत चाणाक्ष आणि आत्मविश्वासपूर्ण होता. मात्र, घरून कोणत्याही पूर्वसूचनेशिवाय निघाल्याने पोलिसांनी तात्काळ त्याचा फोटो समाजमाध्यमांवर आणि हातकणंगले पोलिस ठाण्यात प्रसारित केला.

सोशल मीडियामुळे शोध पूर्ण..
काही तासांतच या मुलाचा फोटो हातकणंगलेतील नागरिकांकडे पोहोचला आणि त्याच्या ओळखीबाबत माहिती मिळाली. मुलाची आई कामावरून घरी परतल्यावर तिला मुलगा हरवल्याचे समजले आणि सोशल मीडियामुळे तो शाहूपुरी पोलीस ठाण्यात असल्याची माहिती देखील मिळाली. संध्याकाळी तातडीने ती कोल्हापूरला पोहोचली.

भावनिक क्षण आणि पोलिसांचे कौतुक
कोल्हापुरातील शाहूपुरी पोलीस ठाण्यात मुलाला सुरक्षित पाहताच मुलासह आईचाही बांध फुटला. शाहूपुरी पोलिस ठाण्यात शहर पोलिस उपअधीक्षक प्रिया पाटील आणि निरीक्षक संतोष डोके यांनी त्या चिमुरड्याला मिठाई दिली आणि त्याला आईच्या ताब्यात दिले. या घटनेनंतर शाहूपुरी पोलिसांच्या जागरूकतेचे आणि संवेदनशीलतेचे सर्वत्र कौतुक होत आहे. दिवाळीच्या काळात अशा प्रसंगी पोलिसांनी दाखवलेली तत्परता आणि मानवी दृष्टिकोन हा समाजासाठी प्रेरणादायी ठरला आहे.