धनत्रयोदशीच्या पूर्वसंध्येला सोने सरासरी १ लाख ३२ हजार रुपये तोळे (१० ग्रॅम) तर चांदी १ लाख ७२ हजार रुपये प्रतिकिलो होती. सराफा व्यावसायिक यावर सरासरी चार ते सहा टक्के ‘प्रीमियम’ लावून सर्रास विक्री करीत होते. या भरमसाट दरांमुळे सर्वसामान्य ग्राहक अन्य धातूंकडे वळत आहेत. भुलेश्वर, काळबादेवी भागातील तांबे-पितळ बाजारात शुक्रवारी त्याची झलक दिसून येत होती. सोनेखरेदी शक्य नसल्याने अनेक ग्राहक पितळेच्या वस्तूंकडे वळले आहेत.
देशातील आजवरची सर्वात मोठी फसवणूक; मुंबईतील व्यावसायिकाने 58 कोटी गमावले, प्रकरण काय?
याअंतर्गत बाजारात पितळेच्या पारंपरिक देवाच्या वस्तूंना मागणी आहेच. मात्र, त्याखेरीज पितळच्या ताट- वाटी-पेला-चमच्याचा संच, पितळेच्या भांड्यांचा, डब्यांचा संच आदींना मोठी मागणी आहे. तांब्याच्या वस्तूंनाही मोठी मागणी आहे.

तांब्याच्या पारंपरिक वस्तूंसह यंदा तांब्याची ताट, वाटी, पेला, चमचा संच बाजारात आला आहे. तसेच तांब्याच्या वाट्या, तांब्याचे पेले यांनाही मागणी आहे. मात्र त्याचे दर पितळेच्या तुलनेत दुपटीहून अधिक आहेत. वाढत्या मागणीमुळे पितळेच्या वस्तूंच्या दरातही २० ते २५ टक्क्यांची वाढ झाली आहे. मात्र, हे दर सोने, चांदीपेक्षा कमीच असल्याने किमान मुहुर्तावर धातू खरेदीचे समाधान ग्राहकांना मिळत असल्याचे चित्र आहे.
Dhanteras 2025: आज धन्वंतरी, लक्ष्मी व कुबेर पूजन; पूजेसाठी दोन तास अत्यंत महत्त्वाचे, जाणून घ्या शुभ मूहूर्त
पिवळ्या स्टेनलेस स्टीलला मागणी
पितळेचे दर स्टेनलेस स्टीलच्या दुप्पट आहेत. त्यामुळे पितळ खरेदी करणे सर्वसामान्यांना शक्य नसल्याने स्टेनलेस स्टीलची खरेदी करण्याकडे ग्राहकांचा कल आहे. ग्राहकांना पितळ खरेदीचा अनुभव यावा, यासाठी या स्टेनलेस स्टीलवर ‘पावडर कोटिंग’ करून त्याद्वारे पिवळ्या रंगाची स्टीलची उपकरणेही भुलेश्वर, काळबादेवीच्या बाजारात आली आहेत. यामध्ये स्टीलच्या ताटांचा संच, वाट्यांचा संच, चमचे, पेला, स्वयंपाकघरासाठीच्या आकर्षक वस्तू यांना मागणी असल्याचे व्यावसायिक मंगेश उपरकर यांनी सांगितले.