अन्नपूर्णा बाळशंकर(वय 50 वर्ष) यांनी जोडभावी पेठ पोलीस ठाण्यात फिर्याद दिली आहे. सुहास सिद्धगणेश हा अनेक महिन्यांपासून पत्नी यशोदा याच्या चारित्र्यावर संशय घेत होता. त्यामुळे दोघा पती-पत्नीत तक्रार होत होती. मंगळवारी सकाळी या तक्रारीचे भांडणात रूपांतर झाले आणि दोघांच्या संसाराचा भयंकर शेवट झाला. सुहासने पत्नीला ठार करून थेट पोलीस स्टेशन गाठले आणि पोलिसांना हकीकत सांगितली. रक्ताने माखलेले कपडे आणि हातात चाकू पाहून पोलिसांना धक्काच बसला. यशोदाच्या आईने आणि बहिणीने तिला शासकीय रुग्णालयात उपचारासाठी दाखल केले. मात्र डॉक्टरांनी त्याला मृत घोषित केले.

पोलीस सूत्रांनी दिलेल्या माहितीनुसार, मृत यशोदा यांची बहीण अन्नपूर्णा बाळशंकर यांनी सोलापुरातील जोडभावी पेठ पोलीस ठाण्यात फिर्याद दिली आहे. यशोदा सिद्धगणेश ही अनेक दिवसांपासून एका मुलीला सोबत घेऊन सोलापूर शहरात पतीपासून विभक्त राहत होती. मंगळवारी सकाळी 8 वाजण्याच्या सुमारास यशोदा सिद्धगणेश हिच्या घरातून जोरात ओरडण्याचा आवाज येत होता. त्यावेळी अन्नपूर्णा बाळशंकर यांनी यशोदाच्या घरात आत डोकावून पाहिलं असता यशोदा लोखंडी बेडजवळ जमिनीवर खाली पडलेली होती व सुहास सिद्धगणेश हा त्याच्या हातातील चाकूने यशोदा हिच्या पोटात व गळ्यावर वार करुन चाकू खुपसत होता.

मध्ये कुणी आला तर खल्लास करेन; सुहासने धमकी दिली-

अन्नपूर्णा बाळशंकर यांनी आरडाओरडा करुन यशोदा हिच्या जवळ जात जाण्याचा प्रयत्न केला. सुहास याने हातात चाकू घेऊन म्हणाला की, “आमच्या मध्ये कोणी आला तर, मी सर्वांना खल्लास करुन टाकीन” अशी धमकी देत यशोदाला खुपसतच राहिला. काही वेळाने हातामध्ये चाकू घेऊन सुहास सिद्धगणेश हा घरातून निघून गेला. हातामध्ये असलेला चाकू रक्ताने माखलेला होता. अन्नपूर्णा यांनी आरडाओरडा करुन आजूबाजूच्या लोकांना गोळा केले. यशोदा ही रक्ताचे थोरोळ्यात निपचित पडली होती. आजूबाजूच्या लोकांनी यशोदा सिद्धगणेश हिला रिक्षामध्ये सिव्हिल हॉस्पिटल येथे उपचारासाठी दाखल करण्यात आले. सिव्हिल हॉस्पिटल येथील डॉक्टरांनी यशोदा हिला तपासून ती मयत झाली असल्याचे सांगितले.