राज्यात विधानसभा निवडणुकीनंतर महाविकास आघाडीतील अनेक बडे नेते महायुतीचा हात धरुन त्यांच्यासोबत गेले. पण स्थानिक स्वराज्य संस्थांच्या निवडणुकांच्या तोंडावर महायुतीतील भाजप, शिवसेना आणि राष्ट्रवादी काँग्रेसमध्ये इनकमिंगला उधाण आल्याचं दिसून येत आहे. राज्याचे उपमुख्यमंत्री आणि शिवसेनेचे पक्षप्रमुख एकनाथ शिंदे यांनी आगामी स्थानिक स्वराज्य संस्थांच्या निवडणुकांसाठी जोरदार मोर्चेबांधणी सुरू केली आहे. राज्यात शिवसेना पक्षाची ताकद वाढवण्यासाठी प्रमुख नेत्यांवर जबाबदारी सोपवतानाच दौरे, बैठका, मेळावे, भेटीगाठी याच्यावर चांगलाच जोर देत असल्याचं पाहायला मिळत आहे.

ठाकरे कुटुंब एक होतंय, राज ठाकरे अडीच तास ‘मातोश्री’वर, मराठी माणसाची ताकद दुप्पट होणार?

विधानसभा निवडणुकीतील उत्तम कामगिरीनंतर आत्मविश्वास वाढलेल्या एकनाथ शिंदे यांनी विरोधी पक्षातील नाराज असलेल्या नेत्यांना शिवसेना पक्षात आणण्यासाठी गळ टाकण्यास सुरू केलं आहे. याचदरम्यान, आता आणखी एक मोठा पक्षप्रवेश लवकरच शिवसेनेत होणार असल्याचं आता समोर आलं आहे. अमळनेर येथील माजी आमदार Shirish Hiralal Chuadhari लवकरच एकनाथ शिंदेंच्या शिवसेनेत प्रवेश करणार आहेत. चौधरी यांनी 2014 साली अमळनेर विधानसभा मतदारसंघातून अपक्ष निवडणूक लढवत आमदारकी आपल्या खिशात घातली होती. त्यानंतर त्यांनी भाजपला पाठिंबा दिला होता. त्यामुळे 2019च्या विधानसभा निवडणुकीत भाजपने त्यांना अधिकृत उमेदवारी दिली होती. परंतु राष्ट्रवादीचे (आत्ताचे अजित पवार गट) उमेदवार अनिल भाईदास पाटील यांनी त्यांचा त्यावेळी पराभव केला होता. त्यानंतर राष्ट्रवादीत फूट पडल्यानंतर अमळनेर विधानसभेची जागा 2024च्या विधानसभा निवडणुकीत राष्ट्रवादी अजित पवार गटाला सुटली होती. त्यावेळी चौधरी यांनी अपक्ष उमेदवारी केली. परंतु, यावेळीही त्यांना पराभवाला सामोरं जावं लागलं. दरम्यान, ते आता उपमुख्यमंत्री एकनाथ शिंदेंच्या उपस्थितीत येत्या मंगळवारी दि. 14 ऑक्टोबर रोजी मुंबईत शिवसेनेमध्ये प्रवेश करणार आहेत.

अजितदादांच्या बालेकिल्ल्ल्यात फडणवीसांची भाजप कार्यकर्त्यांना खास सूचना; युती झाली नाही तर…

आगामी काळात होत असलेल्या स्थानिक स्वराज्य संस्थांच्या निवडणुकांच्या तोंडावर शिरीष चौधरी यांचा शिवसेनेतील पक्षप्रवेश मोठी राजकीय घडामोड मानली जात आहे. चौधरी यांच्या पक्षप्रवेशामुळे शिवसेना शिंदे गटाचे नेते आमदार तथा मंत्री Gulabrao Patil आणि अमळनेरसह जळगाव जिल्ह्यातली ताकदही वाढणार असल्याचं बोललं जात आहे. शिवसेनेतील पक्षप्रवेशाविषयी माजी आमदार शिरीष चौधरी यांनी ‘महाराष्ट्र टाइम्स ऑनलाईन’शी बोलताना ही माहिती दिली.