अजित पवार हे आपल्या पक्षाची ताकद वाढवण्यासाठी राष्ट्रवादी परिवार मिलन कार्यक्रमांतर्गत प्रत्येक कार्यकर्ता आणि नेत्याच्या घरी जाऊन भेटी घेत आहेत. तर आता राष्ट्रवादी शरदचंद्र पवार पक्षाच्या खासदार सुप्रिया सुळे यांनी सुद्धा मैदानात उतरून थेट अजित पवारांच्या पक्षातील नेत्याच्या घरी भेट देत नव्या राजकीय उलथापालथीचे संकेत दिले आहेत. काल सुप्रिया सुळे या पुणे दौऱ्यावर होत्या. या दौऱ्यात त्यांनी अजित पवार यांच्या राष्ट्रवादीच्या माजी नगरसेविका सायली वांजळे यांची भेट घेतली आहे. या भेटीचे अनेक राजकीय अर्थ काढले जात आहेत.

Virar Crime: इमारतीच्या 12 व्या मजल्यावर गेले अन्… दोन मित्रांनी एकत्र आयुष्य संपवलं, नेमकं कारण काय?

बारामती लोकसभा मतदारसंघात येत असणाऱ्या खडकवासला विधानसभा मतदारसंघात सुप्रिया सुळे एका सोसायटीच्या कामाचा आढावा घेण्यासाठी गेल्या असता त्यांनी मनसेचे दिवंगत आमदार यांच्या घरी भेट दिली आहे. यावेळी त्यांनी मनसेकडून 2024ची विधानसभा निवडणूक लढवलेले मयुरेश वांजळे आणि माजी नगरसेविका सायली वांजळे यांची भेट घेतली. दरम्यान, सुप्रिया सुळे या खडकवासला विधानसभा मतदारसंघातील एका रहिवासी सोसायटीमधील कामाचा आढावा घेण्यासाठी आल्या असता त्यांनी ही भेट घेतली. ही राजकीय भेट नसल्याचं मयुरेश वांजळे यांनी ‘महाराष्ट्र टाइम्स’ ऑनलाईनशी बोलताना स्पष्ट केलं आहे.

महाराष्ट्राच्या राजकारणातील मोठी बातमी, उद्या शिवसेना पक्षाचं नाव आणि चिन्हावर अंतिम सुनावणी

मयुरेश आणि सायली वांजळे हे मनसेचे माजी आमदार गोल्डमॅन रमेश वांजळे यांची मुलं आहेत. सध्यस्थीत मयुरेश वांजळे हे मनसेमध्ये आहेत तर सायली वांजळे या अजित पवारांच्या राष्ट्रवादीच्या माजी नगरसेविका आहेत. मात्र, 2024ची विधानसभा निवडणूक मनसेकडून लढवलेले मयुरेश वांजळे हे निवडणुकीनंतर मनसेत फारसे सक्रिय नाहीत. तर सायली वांजळे या सुद्धा महापालिकेतील कामांसाठी अनेक वेळा सुप्रिया सुळे यांना भेटलेल्या आहेत. त्यामुळे सुप्रिया सुळे यांनी घेतलेली वांजळे कुटुंबाची भेट राजकीय नसली तरी आगामी जिल्हा परिषद आणि महापालिका निवडणुकीच्या पार्श्वभूमीवर महत्वाची मनाली जात आहे.