सापळा रचून थरारक कारवाई
4 ऑक्टोबर रोजी रात्री स्थानिक गुन्हे अन्वेषण शाखेचे अमंलदार योगेश गोसावी यांना त्यांच्या बातमीदारामार्फत माहिती मिळाली की, गोवा बनावटीची विदेशी दारू रेनॉल्ट डस्टर कार (MH10 CA8211) मधून भोगावतीमार्गे कोल्हापूरच्या दिशेने येत आहे. महाराष्ट्र राज्यात अशा दारूच्या वाहतुकीवर व विक्रीवर बंदी असताना ती बेकायदेशीररीत्या आणली जात असल्याचे स्पष्ट झाल्यावर पोलिस निरीक्षक रवींद्र कळमकर यांनी उपनिरीक्षक संतोष गळवे यांच्या पथकाला कारवाईचे आदेश दिले. पथकाने रात्री नवीन वाशी नाक्याजवळ द स्पाइस हॉटेल समोर सापळा लावला. भरधाव आलेल्या कारला अडवून तपासणी केली असता, त्यात विदेशी कंपनीच्या गोवा बनावटीच्या 180 मिलीच्या बाटल्यांचे प्रत्येकी 6 बॉक्स, असे एकूण 12 बॉक्स सापडले.

शुभम शिवकुमार साळुंखे (वय 28) आणि आशितोष हिंदुराव साळुंखे (वय 27, दोघे रा. आंधळी रोड, पलूस, जि. सांगली) अशी अटक केलेल्या दोघा भावांची नावे आहेत. हे दोघे सख्खे चुलत भाऊ आहेत. चौकशीत त्यांनी गोव्याला फिरायला गेल्यानंतर ही दारू पलूस परिसरातील बिअरबार चालकांना विकण्याचे नियोजन केल्याचे उघड झाले. पहिल्याच प्रयत्नात त्यांचा गुन्हा पोलिसांच्या हाती लागला. यातील एका आरोपीचे वडील महसूल खात्यात वरिष्ठ अधिकारी असल्याची माहिती देखील पोलिसांनी दिली आहे.

दरम्यान, संपूर्ण मिळालेला 51,840 रुपयांचा दारूसाठा, रेनॉल्ट डस्टर गाडी व इतर साहित्य असा 7,51,840 रुपयांचा मुद्देमाल पोलिसांनी जप्त केला. आरोपींविरुद्ध करवीर पोलीस ठाण्यात महाराष्ट्र दारूबंदी कायद्यान्वये गुन्हा दाखल करण्यात आला असून, दारूसाठा कोठून व कोणासाठी आणण्यात येत होता याचा पुढील तपास सुरू आहे.

दरम्यान गोवा सफरीतून परतताना बनावट विदेशी दारूची तस्करी करताना पोलिसांच्या जाळ्यात अडकलेल्या या दोन चुलत भावांवरील कारवाईमुळे जिल्ह्यातील अवैध दारू व्यवसायावर जरब बसली आहे.