यासंदर्भात अधिक माहिती अशी की, विकास अन्नासाहेब जाधव (वय 28) हे पत्नी साक्षी (वय 23) आणि मुलगा अथर्व (वय 4 सर्व रा. रोहीलागड ता. अंबड, ह. म. शहानगर चिकलठाणा छत्रपती संभाजीनगर) हे उमापुर (ता. गेवराई, जि. बिड) येथे मामाच्या मुलाचे लग्न लावून दुचाकीने (एमएच 20-एचसी 3013) घराकडे जात होते. दरम्यान, शहागड-वडीगोद्री रस्त्यावर महाकाळा फाट्याजवळ भरधाव कंटेनरने (एनएल 01-जी9322) समोर चाललेल्या दोन दुचाकींना पाठीमागून जोराची धडक दिली. यावेळी कंटेनरने दूरपर्यंत या दोन्हीही दुचाकींना फरफटत नेल्या. अपघातस्थळी उपस्थित असलेल्या ग्रामस्थांनी व काही वाहनचालकांनी वाहन थांबवत या कंटेनरला थांबवले, मात्र तोपर्यंत कंटेनर चालकाने घटनास्थळावरून पोबारा केला होता. यावेळी नागरिकांनी दुचाकीवरील जखमींची पाहणी केली असता तिघेही मृत अवस्थेत आढळून आले. नातेवाईकांच्या म्हणण्यानुसार मयत साक्षी जाधव या गरोदर होत्या.

दसऱ्यानिमित्त आईसाठी दागिन घ्यायला गेले अन्…; व्यावसायिकासोबत धक्कादायक प्रकार, घटनेचे CCTV फुटेज समोर

दुसऱ्या दुचाकीवरील (एमएच 16-सीएल 9737) संतोष बनसोडे (वय 29), त्यांची पत्नी मोनिका (वय 25, रा. वळदगाव, जि. छत्रपती संभाजीनगर) हे या अपघातात गंभीर जखमी झाले आहेत. त्यांच्यावर छत्रपती संभाजीनगर येथे रुग्णालयात उपचार सुरू आहेत. तर मयत साक्षी जाधव आणि अथर्व यांच्या मृतदेहाचे पाचोड ग्रामीण रुग्णालयात शवविच्छेदन करण्यात आले. तसंच मयत विकास जाधव यांच्यासह जखमींना छत्रपती संभाजीनगर येथील रुग्णालयात दाखल करण्यात आले होते.

दरम्यान, या भीषण घटनेनंतर राष्ट्रीय महामार्गावर दोन्ही बाजूची वाहतूक ठप्प झाली होती. घटनास्थळी गोंदी ठाण्याचे पोलीस उपनिरीक्षक किरण हवाले, जमादार रामदास केंद्रे, दिपक भोजने आणि महाकाळा येथील ग्रामस्थांनी कंटनेरखालील मयतांना जेसीबीच्या साह्याने बाहेर काढण्यासाठी मदत केली. तसेच खोळंबलेली वाहतूक सुरळीत करण्यासाठी पोलिसांना एक ते दीड तास कसरत करावी लागली आहे. काही क्षणातच एक हसतं खेळतं कुटुंब उद्ध्वस्त झाल्याने संपूर्ण जिल्ह्यात हळहळ व्यक्त केली जात आहे.