गुंजाळा ता. चिखली येथील रहिवाशी शंकर गौनाजी केदार यांना दोन मुले आहेत. लहान मुलगा संतोष शंकर केदार याचे दिड वर्षापूर्वी लग्न झालं असून त्याला 4 महिन्याची मुलगी आहे. त्यांच्याकडे गुंजाळा गावाला लागून गट नंबर 350, 355, 349 मध्ये 5 एकर जमीन आहे. या जमिनीवर त्यांच्या वडिलांनी चिखली येथील आयएफडीसी बँकेकडून गायींसाठी 1 लाख 20 हजार, ट्रॅक्टरसाठी 50 हजार आणि बँक ऑफ महाराष्ट्र शाखा मेरा खुर्दकडून 2 लाख रुपये असे एकूण 3 लाख 70 हजार रुपये कर्ज घेतलं आहे. कर्जाची परतफेड करण्यासाठी त्यांनी यावर्षी शेतात सोयाबीन पिकाची पेरणी केली. मात्र, ढगफुटी सदृश्य पावसामुळे पिकाचे अतोनात नुकसान झालं. त्यामुळे बँकेचं कर्ज कसं फेडावं? या चिंतेत तो राहत असे.

प्रभारी मुख्यध्यापकाचा पहिलीच्या चिमुकलीवर अत्याचार, डोंबिवलीत संतापजनक प्रकार

दरम्यान, गावालगत त्यांच्या शेताला लागून असलेल्या शांताराम मोरे यांच्या शेतातील लिंबाच्या झाडाला सुताच्या दोरीने गळफास घेऊन त्याने आत्महत्या केली. हा प्रकार शेतमालक यांची पत्नी शोभाबाई मोरे ह्या शेतात चारा आणण्यासाठी गेल्या असता त्यांना हा प्रकार दिसून आला. या घटनेची माहिती लगेच कोतवाल सचिन केदार व राजू केदार यांनी पोलिस स्टेशन आणि तलाठी जाधव यांना दिली. त्यावरुन तलाठी जाधव आणि बिट जमादार पोफळे यांनी घटनास्थळी जाऊन पंचासमक्ष पंचनामा केला. याप्रकरणी अंढेरा पोलिसांनी मर्ग दाखल केला आहे. घरातील कर्ता तरुण शेतकरी मुलगा आणि त्याच्या 4 महिन्याची मुलीच्या डोक्यावरील वडिलांचं छत्र हरवलं असल्याने गावकरी हळहळ व्यक्त करत आहेत.