अलिम 25 सप्टेंबर रोजी दुपारी 4 वाजेच्या सुमारास गावाजवळच असलेल्या धामणा धरणामध्ये मासे पकडण्यासाठी गेला होता. त्याने पत्नीला आणि आईला मी कामावरून धरणावर जात आहे. संध्याकाळी आपल्याला मासे बनवण्यासाठी तुम्ही मसाला तयार करून ठेवा. मी धरणातून मासे घेऊन येतो. अलिमचं हे दररोजचं होतं. तो रोज धरणातून मासे आणून आपल्या कुटुंबासोबत जेवायचा. मात्र नियतीच्या मनात मात्र यावेळी काही वेगळंच होतं. अलिम मासे आणण्यासाठी एकटाच गेला, त्याने त्याचे कपडे धरणावर काढून ठेवले आणि धरणात उतरुन तो मासे पकडण्याचं काम करू लागला, मात्र पाण्याचा अंदाज न आल्यामुळे अलिम धरणात बुडाला.
Ratnagiri News : महिला घरातून अचानक गायब, पुलाजवळ पर्स आणि चप्पल दिसली, शोधाशोध केली आणि… रत्नागिरीत धक्कादायक घटना
अलिमची आई, पत्नी आणि संपूर्ण कुटुंब त्याची वाट पाहत होते. संध्याकाळी 4 वाजून गेले, 6-7 वाजून गेले पण अलिमचा पत्ता नव्हता. संपूर्ण रात्रभर वेळ निघून गेली. सकाळी 26 सप्टेंबरला अलिम धरणात मासे पकडण्यासाठी गेला मात्र घरी आला नाही, असं सगळीकडे समजलं. त्यानंतर गावकऱ्यांनी आणि त्याच्या मित्रांनी त्याचा शोध घेण्यास सुरुवात केली. भल्या मोठ्या धरणात पाहायचं तरी कसं, असा प्रश्न गावकऱ्यांसमोर होता. तरी काही तरुणांनी त्याचा शोध घ्यायला सुरुवात केली. अखेर दुपारी 2 वाजेच्या सुमारास अलिम धरणाच्या एका बाजूला कमरेइतक्या पाण्यात बुडालेला अवस्थेत आढळून आला आणि अलिमच्या कुटुंबाने एकच टाहो फोडला.

घटनेची माहिती तात्काळ भोकरदन तालुक्यातील पारध पोलीस ठाण्याचे सहाय्यक पोलीस निरीक्षक संतोष माने यांना देण्यात आली, पोलिसांनी घटनास्थळी धाव घेत ग्रामस्थांच्या मदतीने अलिमचा मृतदेह धरणातून वर काढला आणि मृतदेह अलिमचा असल्याची खात्री गावकऱ्यांकडून करून घेतली. नंतर त्याला धावडा येथील प्राथमिक आरोग्य केंद्रात नेलं असता डॉक्टरांनी तपासून मृत घोषित केलं. शवविच्छेदन करून मृतदेह नातेवाईकांच्या ताब्यात देऊन वडोद तांगडा येथे शोकाकुल वातावरणामध्ये त्याच्यावर अंत्यसंस्कार करण्यात आले. आपल्या तरुण लेकराला गमावलेल्या आईचा टाहो मन हेलावणारा होता. संपूर्ण गावात अलिमच्या जाण्याने हळहळ व्यक्त होत आहे.