उपमुख्यमंत्री अजित पवार यांच्या उपस्थितीत २६ सप्टेंबरला बारामती तालुक्यातील सोमेश्वर सहकारी साखर कारखान्याच्या आवारात शेतकरी मेळाव्याचे आयोजन करण्यात आले होते. या मेळाव्याला पवारांनी संबोधित केले.

यावेळी बोलताना त्यांनी माळेगाव व सोमेश्वर सहकारी साखर कारखान्यांचा उल्लेख केला. सर्वाधिक भाव देणारा सोमेश्वर कारखाना असे बोलत असतानाच अजित पवार मध्येच म्हणाले, आम्हाला खाज होती म्हणून माळेगावचा चेअरमन झालो.. पण तिथे आता सभासद देखील झालो आहे. थोडे थांबा सोमेश्वरला देखील मी सभासद होणार आहे. अन् एकदाच सगळे रेकॉर्डच करून टाकतो. सगळ्याच कारखान्याचा चेअरमन अजित पवार असे अजित पवार म्हणाले आणि थोडे थांबून पुन्हा त्यांनी मी गंमत केली नाही. असे म्हणाले नाही.तर अनेकांना झोपा यायच्या नाहीत. एक तर अगोदरच चेअरमन पदासाठी बाशिंग लावून बसलेले अनेक जण आहेत. त्यांना असं वाटतं की कधी माझे नाव लग्नपत्रिकेवर प्रेक्षक म्हणून चेअरमन या नावाखाली प्रसिद्ध होईल त्यामुळे मी सोमेश्वर सहकारी कारखान्याचा चेअरमन होणार नाही. काळजी करू नका! असे अजित पवार म्हणाले आणि सगळीकडे हशा पिकला.

अजित पवार गेल्या काही दिवसांपासून ज्येष्ठ नेते शरद पवार आणि खासदार सुप्रिया सुळे यांना टोले मारायला कमी करत नाहीत. आज देखील त्यांनी बारामती शहरातील पूर्वीचा तीन हत्ती चौक व आताचा तिरंगा चौक याबद्दल बोलताना सुप्रिया सुळे यांना टोला मारला. अनेक जण खूप लांबून कुणाकुणाला घेऊन येत होते. हे बरोबर आहे का? ते बरोबर आहे का? असे सांगत होते.पण मी पुढील 25 ते 50 वर्षाचे नियोजन करूनच काम करतो. त्यामुळे काही दिवसानंतर टीकाकार टीका करतात. पण नंतर अजित पवारांनी केलेले काम योग्य आहे असेच म्हणतात. असे म्हणताना त्यांनी अप्रत्यक्ष ज्येष्ठ नेते शरद पवारांना देखील टोला मारला.

उपस्थित असलेल्या एका सभासदांकडे अंगुली निर्देश करत बुवा घड्याळावर सगळे उमेदवार उभे करणार आहे. तुम्ही माझ्याबरोबर थांबायचे. हा काळ माझा आहे. प्रत्येकाचा काळ असतो. आता काळ माझा आहे. माझा पण काळ संपेल सध्या तरी माझा काळ आहे. आणि तुम्ही माझ्या बरोबर राहायचे, असे म्हणाले आणि उपस्थितांनी टाळ्या वाजवल्या.