वाढती लोकसंख्या आणि वाढत्या वाहनांमुळे दिवसेंदिवस गंभीर होत चाललेल्या पुण्यातील वाहतूक कोंडीवर उपाय म्हणून पुणे रिंग रोड प्रकल्प राबवण्यात येत आहे. या महत्त्वाकांक्षी प्रकल्पामुळे पुणे, पिंपरी-चिंचवड आणि आजूबाजूच्या तब्बल ८३ गावांना थेट जोडणारा सहा ते आठ लेनचा आधुनिक महामार्ग तयार होणार आहे. रिंग रोड दोन टप्प्यांत विभागला असून आंतरिक रिंग रोड (PMRDA) आणि बाह्य रिंग रोड (MSRDC) अशा दोन विभागांत त्याची अंमलबजावणी सुरू आहे. बाह्य रिंग रोडसाठी डिसेंबर २०२४ मध्ये कामाला सुरुवात झाली असून सुमारे ७० ते ९० टक्के भूसंपादन पूर्ण झाले आहे. आंतरिक रिंग रोडसाठी पहिल्या टप्प्यातील दहा गावांचे सर्वेक्षण पूर्ण झाले आहे.

या प्रकल्पाचा मार्ग कात्रजजवळील गुजर निंबाळकर वाडी भागातून जाणार असून यामुळे स्थानिकांच्या काही घरांना बाधा येणार आहे. रहिवाशांचे म्हणणे आहे की, पूर्वी या भागातून रस्ता जाणार नसल्याचे त्यांना कळविण्यात आले होते. मात्र आता नव्या आराखड्यानुसार प्रस्तावित रस्ता थेट त्यांच्या घरांच्या जागेतून जाणार आहे. या परिसरातील सुमारे पंचवीस कुटुंबांनी महाराष्ट्राच्या विविध भागातून, काहींनी बारामतीहून येऊन येथे स्थायिक होत काही कोटी रुपयांचे बंगले उभे केले आहेत. “आम्ही सर्वसामान्य लोक आहोत. आमची घरं उद्ध्वस्त झाली तर आमचं मोठं नुकसान होईल. आमची घरं वाचवण्यासाठी हा मार्ग बदलावा आणि मुख्यमंत्री फडणवीस यांच्यापर्यंत हा मुद्दा आपण पोहोचवावा,” अशी मागणी रहिवाशांनी शरद पवारांसमोर केली.

दरम्यान, नागरिकांनी या संदर्भात शरद पवारांना निवेदन दिलं. त्यांनी नागरिकांचे म्हणणे शांतपणे ऐकून घेतलं आणि आवश्यक त्या पातळीवर लक्ष घालण्याचे आश्वासन दिल्याचे समजते. दरम्यान, रिंग रोड प्रकल्पामुळे भविष्यात पुण्यातील वाहतुकीला मोठा दिलासा मिळणार असला, तरी ज्यांची घरं बाधित होत आहेत त्यांच्यात चिंतेचं वातावरण आहे. शासनाने या प्रश्नाकडे गांभीर्याने लक्ष द्यावे, अशी मागणी नागरिकांकडून होत आहे.