महामेट्रोकडून एक वर्षापूर्वी स्वारगेट मेट्रो स्थानकाचे उद्घाटन केले. त्या वेळी सातारा रस्त्यावरील एसटी स्थानकाच्या समोरील बाजूचे प्रवेशद्वार खुले करण्यात आले होते. त्यानंतर लवकरच एसटी स्थानकाला जोडणारा भुयारी मार्ग आणि गणेश कला क्रीडा रंगमंचाच्या बाजूचे प्रवेशद्वार सुरू केली जाईल, असे महामेट्रोकडून स्पष्ट करण्यात आले होते; पण एक वर्ष झाले, तरी अद्याप हे सुरू झालेले नाही.

दिवाळीच्या आधी किमान स्वारगेट एसटी स्थानकाला जोडणारा भुयारी मार्ग सुरू होईल, अशी शक्यता होती; पण अद्याप या भुयारी मार्गाची कामे शिल्लक आहेत. त्यामुळे दिवाळीपूर्वी हा भुयारी मार्ग सुरू होण्याची शक्यता कमी असल्याचे मेट्रोच्या वरिष्ठ अधिकाऱ्यांनी सांगितले.

कामात तांत्रिक अडचणी

जेधे चौकात कामासाठी जागा मर्यादित असल्यामुळे टनेलिंग आणि खोदकामाला वेळ लागला. वाहनांची वर्दळ असल्यामुळे पूर्ण चौक बंद करणे शक्य नव्हते. परंतु, तांत्रिक अडचणी आणि मर्यादित जागेमुळे हे काम दिवाळीपूर्वी पूर्ण करणे शक्य नाही. हा भुयारी मार्ग तयार झाल्यावर एसटी स्थानक आणि मेट्रो स्थानक यांदरम्यान पादचाऱ्यांना थेट प्रवेश मिळणार आहे. त्यामुळे जेधे चौकातील गोंधळ, सिग्नलवरील गर्दी व बेकायदा पार्किंगचा त्रास टळेल.