मिळालेल्या माहितीनुसार, खटाव तालुक्यातील कटगुण गावातील गोसावीवस्ती इथं जाधव दाम्पत्य वास्तव्यास होतं. बुधवारी दुपारी 1 वाजताच्या सुमारास चारित्र्याच्या संशयावरून विनोद याचा पत्नीशी वाद झाला. वाद चिघळत गेल्याने विनोदने रागाच्या भरात लोखंडी रॉड उचलून पत्नीच्या डोक्यात घातला. घाव वर्मी बसल्याने पत्नी पिंकी ही जागीच गतप्राण झाली.

पिंकी रक्ताच्या थारोळ्यात निपचित पडल्यानंतर विनोद काहीवेळ घरातच थांबला. नंतर तो स्वत:हून पुसेगाव पोलीस ठाण्यात हजर झाला. पोलिसांसमोर त्याने पत्नीच्या हत्येची कबुली दिली. ती माहिती ऐकून पुसेगाव पोलिसही हादरून गेले. पोलिसांनी तातडीने घटनास्थळी धाव घेतली. पंचनामा करून मृतदेह शवविच्छेदनासाठी ग्रामीण रुग्णालयात पाठवला. पत्नीच्या खून प्रकरणी पोलिसांनी विनोद जाधव याला अटक केली असून सहाय्यक पोलीस निरीक्षक संदीप पोमण पुढील तपास करत आहेत.

बेपत्ता विद्यार्थिनीला संपवलं, मग बॉडीसोबत नको ते केलं; लेकीची अवस्था पाहून आई-वडील स्तब्ध

संशयित आरोपी विनोद जाधव हा शेतीकाम करत होता. त्यांच्या लग्नाला काही वर्षेच झाली होती. त्यांना तीन लहान मुले आहेत. मुलांच्या डोळ्यासमोर पतीने पत्नीची हत्या केल्याची चर्चा कटगुण गावात आहे. पती-पत्नीमध्ये अधूनमधून किरकोळ भांडणे होत असत. मात्र, त्यांच्यातील वाद एवढ्या टोकाला जाईल, असे कुणालाच वाटले नव्हते, अशी प्रतिक्रिया ग्रामस्थांनी दिली. पोलीस तपासात या घटनेमागील आणखी तपशील समोर येण्याची शक्यता आहे.

दरम्यान, माण आणि खटाव तालुक्यात मागील आठ दिवसात महिलांच्या खुनाच्या एकामागोमाग एक अशा तीन घटना घडल्या आहेत. माण तालुक्यातील दोनपैकी एका महिलेच्या हत्येचा गुन्हा उघडकीस आला आहे, तर दुसऱ्या महिलेच्या हत्येचा तपास सुरू असून कोणतेही धागेदोरे पोलिसांच्या हाती आलेले नाहीत. त्यानंतर आता खटाव तालुक्यात पतीने पत्नीची हत्या केल्याची घटना घडली आहे.