माजी नगरसेवक वनराज आंदेकरच्या खून प्रकरणातील आरोपी गणेश कोमकर याचा मुलगा आयुष गणेश कोमकर याच्यावर गोळीबार करून निर्घृण खून केल्याप्रकरणी आंदेकर टोळीचा म्होरक्या बंडू उर्फ सूर्यकांत राणोजी आंदेकर (वय 70, रा. नाना पेठ) याच्यासह 13 जणांवर खून व महाराष्ट्र संघटित गुन्हेगारी नियंत्रण कायद्यानुसार (मकोका) समर्थ पोलिस ठाण्यात गुन्हा दाखल आहे. बंडू आंदेकरचा मुलगा कृष्णा उर्फ कृष्णराज सूर्यकांत आंदेकर (वय 36, रा. नाना पेठ) स्वतःच्या भाच्याच्या खुनानंतर पसार झाला होता. पुणे पोलिसांच्या गुन्हे शाखेची पथके त्याचा माग काढत होती. ‘ कृष्णा आंदेकर याची माहिती दे, नाहीतर त्याचा एनकाउंटर करू,’ अशी धमकी दिल्याचा खळबळजनक दावा बंडू आंदेकर याने सोमवारी केला होता. दुसऱ्याच दिवशी कृष्णा आंदेकर स्वतःहून समर्थ पोलिस ठाण्यात शरण आला. त्यानंतर पुणे पोलिसांच्या गुन्हे शाखेने त्याला अटक करून विशेष न्यायाधीश एस. आर. साळुंखे यांच्या न्यायालयात हजर केले.

Krishna Andekar : कुटुंबातील सर्वात ‘तापट’ मुलगा, लहानपणापासून गुन्हेगारीचं आकर्षण, 17व्या वर्षी बंदूक हातात; पुण्याला हादरवणारा कृष्णा आंदेकर कोण?

‘मालमत्ता व पैशांच्या वादातून हा खून झाला असून, त्यामध्ये कृष्णा आंदेकरची मुख्य भूमिका आहे. गुन्ह्यात वापरलेले पिस्तूल कृष्णाने दिले असल्याची कबुली अमन पठाण व सुजल मेरगू यांनी दिली आहे. कृष्णाने पिस्तूल कोठून आणले, फरार असताना तो कोणाच्या संपर्कात होता, या कालावधीत त्याने पुरावा नष्ट केला आहे का, आदी मुद्द्यांवर तपास करायचा आहे. आरोपीच्या स्थावर व जंगम मालमत्तेची माहिती मिळवायची आहे. त्यासाठी आरोपीला पोलिस कोठडी द्यावी,’ अशी मागणी सहायक आयुक्त शंकर खटके व विशेष सरकारी वकील विलास पठारे यांनी केली. आरोपीच्या वतीने अॅड. मनोज माने, अॅड. मिथुन चव्हाण, अॅड. प्रशांत पवार यांनी बाजू मांडली. ‘गुन्ह्यात वापरलेले पिस्तूल आधीच जप्त करण्यात आले आहे. आरोपी स्वतःहून पोलिसांसमोर हजर झाला असून, तपास यंत्रणेला सहकार्य करत आहे. त्यामुळे त्याच्या पोलिस कोठडीची आवश्यकता नाही,’ असा युक्तिवाद अॅड. मनोज माने यांनी केला.

कृष्णा आंदेकरला दोन दिवसांची पोलिस कोठडी

सरकार व बचाव पक्षाचा युक्तिवाद ऐकल्यानंतर विशेष न्यायाधीश एस. आर. साळुंखे यांनी आरोपी कृष्णा आंदेकरला १८ सप्टेंबरपर्यंत पोलिस कोठडी सुनावली. त्यामुळे या गुन्ह्यातील सर्व आरोपी आता पोलिस कोठडीत असून, तपास अधिकाऱ्यांना त्यांची वैयक्तिक व एकत्रित चौकशी करता येणार आहे.

‘दिल्ली’च्या परवानगीची आम्हाला गरज नाही, अजित पवारांचा मित्र पक्षांना टोला

मोबाइल तोडला; नोटीसही घेतली नाही

पोलिसांनी कृष्णा आंदेकरकडे त्याचा मोबाइल मागितला असता, त्याने तो तोडून फेकून दिला असल्याचे सांगितले; तसेच ‘मकोका’ कायद्यानुसार कारवाईची नोटीसही घ्यायला नकार दिल्याची कबुली आरोपीने न्यायालयात दिली.