पोलिसांकडून प्राप्त माहितीनुसार, दोन्ही विद्यार्थिनी दहावीत शिकतात. शनिवारी सकाळी ९ वाजताच्या सुमारास चौधरी यांनी दोन विद्यार्थिनींना शाळा परिसरातील कचरा साफ करण्यास सांगितले. ‘हे आमचे काम नाही,’ असे सांगत दोन्ही विद्यार्थिनींना कचरा वेचण्यास नकार दिला, यामुळे चौधरी संतापल्या. त्यांनी छडीने दोन्ही विद्यार्थिनींच्या पायावर जबर मारहाण केली. दोघीही अत्याव्यस्थ झाल्या. काही काळ त्यांची शुद्धीही हरवली.

सकाळी १० वाजताच्या सुमारास शाळेतील दोन शिक्षकांनी दोघींना घरी सोडले. दोघीही अत्याव्यस्थ बघून पालक घाबरले. त्यांनी शिक्षकांना घटने माहिती विचारली. शाळेच्या मैदानावरील कचरा साफ करण्यास मुलींनी मनाई केल्याने शिक्षिका मनीषा चौधरी यांनी दोघींना छडीने मारहाण केल्याचे पालकांना सांगितले. त्यानंतर दोघींना घेऊन पालकांनी थेट कोंढाळी पोलीस ठाणे गाठले. तक्रार दिली. त्यानंतर पोलिसांनी दोघींना प्राथमिक आरोग्य केंद्रात दाखल केले. एकीला उपचारानंतरच सुटी देण्यात आली तर अन्य एका विद्यार्थिनीला नागपुरातील हॉस्पिटलमध्ये दाखल करण्यात आले.

पालकाच्या तक्रारीवरुन पोलिसांनी चौधरी यांच्याविरूद्ध अल्पवयीन न्याय (मुलांची काळजी व संरक्षण) कायद्याच्या कलम ७५ व मारहाणीचा गुन्हा दाखल केला. ठाणेदार राजकुमार त्रिपाठी या प्रकरणाचा तपास करीत आहे. यापूर्वीही नागपुरातील कपिलनगरमधील एका शाळेत अशीच घटना घडली होती. परंतु हे प्रकरण सामंजस्याने निपटविण्यात आले. पालकाने पोलिसांत तक्रार दिली नाही.

शिक्षिका चौधरी निलंबित

दरम्यान, या घटनेची गंभीर दखल जिल्हा परिषदेचे मुख्य कार्यकारी अधिकारी विनायक महामुनी यांनी घेत चौकशीचे आदेश दिले. प्राथमिक चौकशीत शिक्षिका चौधरी यांनी विद्यार्थिनींना मारहाण केल्याचे समोर आले. त्यानंतर तडकाफडकी चौधरी यांना निलंबित करण्यात आले. जिल्हा परिषदेच्या वरिष्ठ अधिकाऱ्याने या वृत्ताला दुजोरा दिला आहे.