मिळालेल्या माहितीनुसार, आरती प्रकाश कांबळे (वय 30, राहणार उस्मानपुरा पीर बाजार जवळ) आणि प्रतीक्षा बाळासाहेब भादवे (वय 25 राहणार उस्मानपुरा पीर बाजार) असं दारूच्या नशेत राडा करणाऱ्या तरुणींची नावे आहेत. याप्रकरणी स्थानिकाने सांगितलं की, शुक्रवारी मध्यरात्री 12 वाजेच्या सुमारास जालना रोडवरील मोंढा नाका येथे दोन तरुणी आल्या. या दोन्ही तरुणी दारूच्या नशेत तर्र झालेल्या होत्या. या तरुणींनी एकमेकींना शिवीगाळ करायला सुरुवात केली. त्यानंतर जवळच असलेल्या डॉमिनोज पिझ्झाच्या दुकानाजवळ जाऊन गोंधळ घालत दुकानाच्या काचांची तोडफोड केली. त्यानंतर दोन्ही तरुणी मुख्य रस्त्यावर गेल्या. इथे दोघींनी एकमेकींना शिवीगाळ करत हाणामारी करायला सुरुवात केली. जवळपास तासभर हा प्रकार सुरू होता.

दरम्यान, कुठलाही अनुचित प्रकार घडू नये यासाठी नागरिकांनी घटनेची माहिती पोलिसांना दिली. पोलीस घटनास्थळी दाखल झाले. दोघींना ताब्यात घेत असताना सदर तरुणींनी पोलिसांसोबत हुज्जत घातली. समजूत काढत पोलिसांनी तरुणींना घाटी रुग्णालयात मेडिकलसाठी दाखल केले. या प्रकरणी पोलीस निरीक्षक शिवाजी बुधवंत यांच्या मार्गदर्शनाखाली सार्वजनिक ठिकाणी गोंधळ घालून शांतता भंग केल्याप्रकरणी दोन्ही तरुणींविरुद्ध गुन्हा दाखल करण्यात आला आहे. या प्रकरणाचा पुढील तपास सहाय्यक फौजदार घोडके करीत आहेत. या घटनेचा व्हिडिओ मोबाईल कॅमेरात कैद झाला असून हा व्हिडिओ सध्या सोशल मीडियावर चांगलाच व्हायरल होत आहे.