घरासमोरील नाल्यात सापडला बाळाचा मृतदेह

एका स्थानिक रहवासी आणि त्यांच्या मुलाला ठाण्याच्या नेताजी मार्केट परिसरात असलेल्या त्यांच्या घराबाहेर असलेल्या नाल्यात लहान बाळाचा मृतदेह आढळून आला. ही बातमी वाऱ्यासारखी पसरली. त्यानंतर घटनास्थळी बघ्यांची गर्दी जमा झाली. या चिमुकल्या बाळाला अशाप्रकारे कोणीतरी नाल्यात कसं फेकू शकतं, असं संतप्त प्रश्न स्थानिक विचारत आहेत.
Thane News: चिकन खाल्ल्यानंतर कुटुंब अत्यवस्थ; तीन वर्षांच्या चिमुकलीचा तडफडून मृत्यू,भाईंदरमध्ये मन सुन्न करणारी घटना
एका अधिकाऱ्याने सांगितले की, माहिती मिळताच पोलिस पथक घटनास्थळी पोहोचले आणि बाळाचा मृतदेह शवविच्छेदनासाठी सरकारी रुग्णालयात पाठवण्यात आला. पोलिसांनी दिलेल्या माहितीनुसार, मृत बाळ सुमारे पाच महिन्यांचे होते आणि या प्रकरणाचा तपास सध्या सुरू आहे.

मुंबई विमानतळाच्या शौचालयात कचऱ्याच्या डब्यात नवजात बाळ

हा अशा प्रकारचा पहिलाच प्रकार नाही, तर अशा प्रकारे नवजात बाळ फेकल्याचे अनेक वेळा दिसून आले आहे. काही महिन्यांपूर्वी मुंबईतील छत्रपती शिवाजी महाराज आंतरराष्ट्रीय विमानतळ (T2) येथे एक हृदयद्रावक घटना उघडकीस आली होती. येथे विमानतळाच्या शौचालयात कचऱ्याच्या डब्यात एका नवजात बाळाचा मृतदेह आढळून आला होता.

रात्री उशिरा साडे दहा वाजताच्या सुमारास, विमानतळ सुरक्षा अधिकाऱ्यांना शौचालयातील कचऱ्याच्या डब्यात नवजात बाळ असल्याची माहिती मिळाली आणि संपूर्ण विमानतळावर एकच खळबळ माजली. त्यानंतर तातडीने पोलिसांना बोलावण्यात आलं. मुलाला रुग्णालयात नेण्यात आले परंतु तपासणीनंतर डॉक्टरांनी त्याला मृत घोषित केले. पोलिसांनी तात्काळ गुन्हा दाखल करून तपास सुरू केला.