आयुषच्या अंत्यविधीसाठी त्याचे वडील गणेश कोमकर हा पॅरोलवर सुटून आला होता. तो माजी नगरसेवक वनराज आंदेकर हत्या प्रकरणातील आरोपी आहे. याच हत्या प्रकरणी तो नागपूरच्या कारागृहात गेल्या वर्षभरापासून शिक्षा भोगत आहे. वनराजच्या हत्येचा बदला घेण्यासाठी बंडू आंदेकर याच्या टोळीने त्याच्या सख्या नातवाचा बळी घेतला. हे टोळी युद्ध कुटुंबातल्या कुटुंबात इतक्या टोकावर पोहोचलं आहे.

दरम्यान, आयुषच्या अंत्यविधीवेळी पुणे पोलिसांनी स्मशानभूमी परिसरात मोठा फौजफाटा तैनात केलेला होता. कोणताही घातपात घडू नये यासाठी काळजी घेण्यात आली होती. त्याचाच एक भाग म्हणजे आधी आयुषचं पार्थिव स्मशानभूमीत आणण्यात आलं होतं. यानंतर पोलीस व्हॅनमधून गणेश कोमकर अंत्यविधीसाठी आला. यावेळी त्याने पोलीस व्हॅनमधून उतरताच लोकांना काही फोटो दाखवले. हे दृश्य पाहून अनेकांना आश्चर्य वाटलं. गणेश नेमकं काय दाखवू पाहत आहे? असा प्रश्न अनेकांना पडला. माध्यमांनी गणेशच्या हातात नेमकं काय आहे? ते जाणून घेण्याचा प्रयत्न केला. गणेशने यावेळी स्वत: रडत आपल्या हातात नेमकं काय आहे ते सांगितलं.

गणेशच्या हातात त्याच्या मुलाने आयुषने दिलेलं भेटकार्ड होतं. या भेटकार्डमध्ये ‘आय लव्ह यु पप्पा’ असं लिहिलेलं आहे. गणेश कोमकर हा जेलमध्ये शिक्षा भोगत असताना आयुषने आपल्या पित्याला हे खास भेटकार्ड पाठवलेलं होतं. या भेटकार्डमध्ये गणेश कोमकर आणि मुलगा आयुषचे लहानपणापासून फोटो आहेत. आयुषने आपल्या पित्याला ते फोटो जेलमध्ये गिफ्ट दिले होते. तसेच त्यामध्ये ‘नवीन ड्रेस पाठवला आहे’, असंही आयुषने लिहिलेलं होतं. आयुषने स्वत:च्या हातांनी त्या भेटकार्डमध्ये ‘आय लव्ह यु पप्पा’ लिहिलेलं होतं.

आयुषने आपल्या पित्याला दिलेली हे शेवटची भेटवस्तू होती. हीच भेटवस्तू घेऊन गणेश आपल्या मुलाच्या अंत्यविधीला आला होता. गणेशने आधी हे भेटकार्ड लोकांना दाखवलं. यानंतर तो मुलाच्या पार्थिवाकडे गेला. त्याने मुलाच्या पार्थिवाजवळ टाहो फडला. तो ढसाढसा रडू लागला. तो मुलाला त्याच्या भेटकार्डबद्दल सांगू लागला. ते भेटकार्ड आपण जपून ठेवल्याचं सांगू लागला. त्याने ते भेटकार्ड अगदी छातीशी कवटाळून घेतलं. तो यावेळी प्रचंड रडत होता. त्याचा आक्रोश तिथे उपस्थित असणाऱ्यांच्या काळजाला चीर पाडत होता. यावेळी प्रचंड शोकाकुल वातावरण झालेलं होतं.

गणेशने यावेळी पोलिसांना सवाल केला. माझी काही चूक नव्हती. तरी आपल्या लेकराचा जीव का घेतला गेला? असा सवाल त्याने पोलिसांना केला. तसेच मला स्वत:ला गोळ्या घाला, असं म्हणत गणेश कोमकर रडत होता. यावेळी आयुषचे इतर भावंड आणि नातेवाईकही आक्रोश करत होते.