ही घटना बुधवारी रात्री साडेदहाच्या सुमारास घडली. शैलेश नावाच्या एका तरुणाचा पैशांच्या वादावरून काही युवकांशी वाद सुरू होता. वाद वाढताच आरोपींनी शैलेशवर हल्ला करण्याचा प्रयत्न केला, मात्र उपस्थित लोकांनी मध्यस्थी करून मारहाण थांबवली. त्यावेळी आरोपींनी “पाहून घेऊ” अशी धमकी देत घटनास्थळ सोडले. काही वेळातच सुमारे १५ ते २० जण पुन्हा तलवारी, लाठ्या घेऊन घटनास्थळी दाखल झाले. त्यांनी शैलेशचा शोध घेतला, पण तो न मिळाल्याने रस्त्यावर उभ्या असलेल्या वाहनांवर दगडफेक व तोडफोड सुरू केली. काही मिनिटांतच २० हून अधिक वाहनांचे नुकसान झाले. आरडाओरड व दहशत निर्माण करणाऱ्या या कृतीमुळे परिसरात भीतीचे वातावरण पसरले.

यावेळी परिसरात गणेशोत्सवाचे सांस्कृतिक कार्यक्रम व महाप्रसाद वितरण सुरू होते. अचानक झालेल्या गोंधळामुळे नागरिक घाबरून गेले. महिलांमध्ये व ज्येष्ठांमध्ये भीती निर्माण झाली आणि काहींनी सुरक्षिततेसाठी घरांचा आश्रय घेतला. नागरिकांनी तात्काळ पोलिसांना कळविले. माहिती मिळताच पोलीस उपायुक्त राहुल मदने, शांतिनगर पोलिस ठाण्याचे अधिकारी आणि क्राइम ब्रांचचे पथक घटनास्थळी दाखल झाले. पोलिसांनी तत्काळ कारवाई करत अल्पावधीतच १७ आरोपींना ताब्यात घेण्यात आले. नागरिकांचा विश्वास परत मिळवण्यासाठी पोलिसांनी आरोपींना घटनास्थळावर आणून त्यांची परिसरात धिंड काढली. या मुळे पीडितांना आरोपींची ओळख पटवणे सोपे झाले आणि लोकांनी थेट त्यांच्याविरुद्ध तक्रारी नोंदवल्या.

नागपूर शहरात गुंडगिरी सहन केली जाणार नाही असा स्पष्ट संदेश पोलिसांनी या कारवाईदरम्यान दिला. पोलिस आयुक्त डॉ. रवींद्र सिंगल यांनी घटनेला गंभीर मानून आरोपींवर कडक प्रतिबंधात्मक कारवाई करण्याचे आदेश दिले आहेत. त्यांनी नागरिकांना घाबरून न जाता पोलिसांना सहकार्य करण्याचे आणि योग्य माहिती देण्याचे आवाहन केले.