दहा ते १५ मिनिटांच्या अंतरासाठी एक ते दीड तासांचा खोळंबा, खड्डेमय प्रवासाने वाहनचालक बेजार, अवजड वाहनांच्या कोंडीत सर्वसामान्य हैराण अशा विशेषणांनी वाहतूक कोंडीच्या गर्तेत अडकलेल्या घोडबंदरवासियांचे मेट्रो मार्गिकेकडे डोळे लागले होते. मुंबईहून विनाअडथळा घोडबंदरच्या दिशेने येणारी वाहने कापूरबावडी जंक्शनपासूनच कासवगतीने पुढे सरकतात. अवजड वाहनाच्या अपघातानंतर होणारी कोंडी व पावसाळ्यात या मार्गावरील वाहनचालकांच्या सहनशीलतेची कसोटी लागते.

अशा परिस्थितीत येत्या सप्टेंबर महिन्यामध्ये मेट्रोचे ट्रायल रन सुरु होणार असून ही मेट्रो या वर्षाअखेरीस सुरु होईल, असे प्रतिपादन दोन आठवड्यांपूर्वी ठाण्यात उपमुख्यमंत्री व मुंबई महानगर प्रदेश विकास प्राधिकरणाचे (एमएमआरडीए) अध्यक्ष एकनाथ शिंदे यांनी केले. ही घोषणा होताच उलटसुलट चर्चांना उधाण आलेले असतानाच सोमवारी या मेट्रोचे कोच घोडबंदर रोडच्या आनंदनगर जंक्शन येथे दाखल झाले. त्यामुळे ठाणेकरांना मेट्रो मार्गिका आणि स्थानकांच्या पलीकडे आता मूर्त स्वरूपात या मार्गावर मेट्रो कोच दिसत आहेत. शिंदे यांनी केलेल्या घोषणेनुसार येत्या सप्टेंबर महिन्यात या मार्गिकेवर गाडीची चाचणी झाल्यास सत्ताधारी शिवसेनेसह भाजपला आगामी पालिका निवडणुकीत प्रचारात मेट्रोच्या स्वप्नपूर्तीचा हक्काचा मुद्दा मिळणार आहे.
Spruha Joshi : मी दिसतेय का? स्पृहा जोशीचा उंचीवरुन मिश्किल प्रश्न, अजितदादांनी सांगितला मनाला भिडणारा किस्सा

इच्छुकांची ‘मेट्रो’ सुसाट

घोडबंदर रोड परिसरातील ठाणे महापालिकेचे बहुतांश प्रभाग ओवळा – माजिवडा विधानसभेच्या अंतर्गत येतात. तसेच काही प्रमाणात ठाणे शहर विधानसभेच्या हद्दीत येथील प्रभाग मोडतात. त्यामुळे या पट्ट्यातील माजी लोकप्रतिनिधींसह सत्ताधारी पक्षांतील इच्छुकांना हा ‘मेट्रो मुद्दा’ आगामी पालिका निवडणुकीत ‘मतपेटी’च्या माध्यमातून गती देण्याची शक्यता अधिक आहे.

बांधकाम क्षेत्रालाही गती

नागरीकरणाच्या रेट्यात घोडबंदर रोडवर गेल्या १५ ते २० वर्षांत टोलेजंग इमारती उभ्या राहत असताना याठिकाणी पोहचताना नागरिकांना या कोंडीचा सामना करावा लागत होता. मात्र या मेट्रो चाचणीच्या बळावर येथील बांधकाम क्षेत्राला निश्चितच अधिकाधिक गती मिळणार असून या भागातील विकासकांकडून सदनिकांच्या जाहिरातीत ‘मेट्रो’वर अधिक भर देण्याची चिन्हे आहेत.
Vaibhav Khedekar : भाजप प्रवेशाच्या चर्चा सुरु होताच राज ठाकरेंनी बाहेरचा रस्ता दाखवला, वीस वर्षांची साथ संपली, मनसे सरचिटणीस पक्षातून बडतर्फ

१५ वर्षांच्या पाठपुराव्याला यश : परिवहनमंत्री प्रताप सरनाईक

या मेट्रो मार्गिकेसाठी मी १५ वर्षांपासून पाठपुरावा करत असून ओवळा – माजिवडा मतदारसंघांचे प्रतिनिधित्व सुरु केल्यापासून माझ्यासह उपमुख्यमंत्री एकनाथ शिंदे व संपूर्ण ठाणेकरांचे ‘मेट्रो’ हे स्वप्न होते. २०११ साली नागपूर हिवाळी अधिवेशनात तत्कालीन मुख्यमंत्री पृथ्वीराज चव्हाण असताना विधिमंडळाच्या पायऱ्यांवर आम्ही त्यासाठी आंदोलन केले. त्यानंतर २०१६ साली ठाण्यात अखिल भारतीय मराठी नाट्य संमेलनाच्या मंचावर तत्कालीन मुख्यमंत्री देवेंद्र फडणवीस यांना मेट्रोची प्रतिकृती भेट देत आम्ही या मागणीकडे लक्ष वेधले होते. येत्या काळात ही मेट्रो ‘वडाळा – ठाणे – मीरा भाईंदर – मुंबई’ अशी लूप तयार होणार असल्याने सर्वसामान्यांना मोठा दिलासा मिळणार आहे.
– प्रताप सरनाईक, परिवहनमंत्री