Nashik MNS Video: नाशिकमध्ये मराठी विरुद्ध परप्रांतीय वाद उफाळून आला असून एका परप्रांतीय व्यक्तीने मराठी कुटुंबाला गाडीच्या धडकेनंतर अरेरावी करत अपशब्द वापरले. त्यामुळे मनसे कार्यकर्त्यांनी त्याला चोप देऊन माफी मागायला लावली. या घटनेचा व्हिडिओ सोशल मीडियावर व्हायरल झाला आहे.
याबाबतची सविस्तर माहिती अशी की, नाशिकरोडच्या जयभवानी रोडवर एक लासुरे नावाचे मराठी कुटुंब राहते. नुकतीच एका परप्रांतीय व्यक्तीने त्यांच्याशी दादागिरी केली. सदर व्यक्तीने त्यांना शिवीगाळ आणि मारहाण देखील केली. तो माणूस चारचाकी गाडी चालवायला शिकत होता. त्यावेळी त्याने लासुरे यांच्या प्लेजर या दुचाकीला धडक दिली. त्यामुळे दुचाकीला नुकसान झाल्याने लासुरे कुटुंबीयांनी त्याला जाब विचारला.
जाब विचारल्यावर तो माणूस चिडला आणि त्याने लासुरे कुटुंबाला अपशब्द वापरले. “तुम मराठी लोग तुम्हारे औकात मे रहो, तुम्हारी गाडी भंगार है, और तुम्हारा घर भी भंगार है,” असं मराठी कुटुंबाला उद्देशून तो म्हणाला.
या घटनेची माहिती जयभवानी रोडवरील मनसेच्या कार्यकर्त्यांना मिळाली. त्यांनी त्या परप्रांतीय व्यक्तीला समजवण्याचा प्रयत्न केला. पण तो माणूस उद्धटपणे बोलला. तो म्हणाला, “मला मराठी येत नाही व मी हिंदीत बोलणार, तुम्ही माझाशी हिंदीत बोला”. या मग्रुरीमुळे मनसे कार्यकर्त्यांना राग अनावर झाला आणि मनसे कार्यकर्त्यांनी त्याला चांगलाच चोप दिला. तसंच त्यांनी त्याला मराठी कुटुंबाची माफी मागायला लावली.
दरम्यान, हा सर्व प्रकार कॅमेऱ्यात कैद झाला असून याबाबतचा व्हिडिओ सोशल मीडियात व्हायरल झाला आहे.
लेखकाबद्दलअक्षय शितोळेअक्षय शितोळे | २०१८ पासून डिजिटल मीडियात कार्यरत असून सध्या मटा ऑनलाइनमध्ये प्रिन्सिपल डिजिटल कंटेंट प्रोड्युसर म्हणून जबाबदारी सांभाळत असताना राज्यभरातील रिपोर्टर्ससोबत समन्वय साधण्याचेही काम करत आहे. राजकीय बातम्यांमध्ये विशेष रस, बातम्यांमागची बातमी अर्थात घडामोडींचा विश्लेषणात्मक आढावा घेण्याचा सातत्याने प्रयत्न असतो. शेती आणि ग्रामीण जीवन हे जिव्हाळ्याचे विषय आहेत. यापूर्वी लोकमत, न्यूज १८ लोकमत आणि एबीपी माझा या संस्थांमध्येही कामाचा अनुभव असून मुंबईतील रूईया महाविद्यालयातून पत्रकारितेत पदवी प्राप्त केली आहे.… आणखी वाचा