पिंपरी चिंचवड शहरातील निगडी-प्राधिकरण परिसरात एक व्यक्ती हातात धारदार शस्त्र घेऊन फिरत असल्याचा एक व्हिडीओ सध्या व्हायरल होत आहे. धक्कादायक बाब म्हणजे हा व्यक्ती चेहऱ्यावर मास्क लावून हा व्यक्ती फिरत असल्याने एकच खळबळ उडाली आहे. सुदैवाने अजून या व्यक्तीकडून कुणालाही इजा केली गेली नसल्याची माहिती आहे. त्यामुळे हा व्यक्ती काही प्रँक करतोय की कुणावर हल्ला करण्याच्या उद्देशाने फिरतोय याबाबत निगडी पोलिसांकडून तपास सुरू करण्यात आला आहे.

अखेर सस्पेन्स आणि धाकधूक संपली; पुण्याच्या विसर्जन मिरवणुकीचा वाद मिटला, आतली बातमी काय?

तोंडाला मास्क लावलेला हा इसम आपल्या हातात धारदार शस्त्र घेऊन रस्ता क्रॉस करताना दिसत आहे. पिंपरी चिंचवडमधील निगडी प्राधिकरणाच्या जवळ असणाऱ्या एचपी पेट्रोल पंपाशेजारील नागरिकांनी या ‘मास्क मॅन’ प्रत्यक्षात पाहिलं असून परिसरात मोठी दहशत निर्माण झाली आहे. हा वरदळीचा परिसर असताना देखील हा इसम दिवसाढवळ्या शस्त्र हातात घेऊन फिरत असल्यामुळे एकच खळबळ उडाली आहे.

दरम्यान, पिंपरी-चिंचवड पोलीस प्रशासन या व्हिडिओची सत्यता तपासत आहे. मात्र, अशा प्रकारे शस्त्र घेऊन जर कोणी फिरत असेल तर अशा फिरणाऱ्या व्यक्तीवर कडक कारवाई केली जाईल, असं पिंपरी चिंचवड पोलिसांनी सांगितलं आहे. सदर व्यक्तीला ताब्यात घेण्यासाठी पोलीस पथके परिसरात गस्त घालून शोधमोहीम राबवत आहेत.