मिठी नदीला आलेल्या पुरामुळे कुर्ला डेपो परिसरात आणि एलबीएस रस्त्यावर पाणी साचले होते. यामुळे अनेक वाहने अडकली होतो. त्याच बरोबर अंधेरी, कुर्ला घाटकोपर रोड मरोळ नाका, बीपीटी रोडवरील कॉटन फाटक परिसरात २ फूट पाणी साचले होते. पेडर रोड, महालक्ष्मी मंदिर आणि ताडदेव परीसरात दिड फूट पाणी साचले होते. यामुळे रस्ते वाहतूक बंद होती. दरम्यान वाहतूक कोंडी टाळण्यासाठी मुंबई वाहतूक पोलिसांनी चेंबूर ते सांताक्रूझ दरम्यान एससीएलआर टाळण्यासाठी वांद्रे कुर्ला संकुल कनेक्टर घाटकोपर अंधेरी लिंक रोड, पवई जेव्हीएलआर मार्ग वापरण्याच्या सूचना केल्या.
Thane Rain : पावसामुळे ठाण्याची दाणादाण; ठाणे, दिवा, मुंब्रामधील घरांमध्ये पाणी, कल्याण-भिवंडीत २०४ नागरिकांचे स्थलांतर
शहरातील विविध भागांतील वाहतूक कोंडी आणि साचलेल्या पाण्यामुळे बंद झालेल्या रस्त्यावरील खोळंबा टाळण्यासाठी मुंबई वाहतूक पोलिसांनी अधिकृत एक्स हँडलवरून माहिती दिली. यामुळे वाहन चालकांना मोठा दिलासा मिळाला होता. रेल्वे विलंबाने असल्याने कल्याणवरून सीएसएमटीला जाण्यासाठी २३०० रुपयांचा दर ओला, उबर अशा ॲप आधारित कंपन्यांच्या ॲपवर दाखवण्यात आला. चर्चगेटसाठी हाच दर २४०० रुपये होता.

कल्याण ते ठाणे दरम्यान दोन तास प्रवास केल्यानंतर ठाणे स्थानकात पोहोचलो त्यापुढे लोकल जात नसल्याने ॲप टॅक्सीने कार्यालय गाठण्याचा निर्णय घेतला. ठाणे ते सीएसएमटी / चर्चगेटसाठी १४०० / १५०० रुपये दाखवण्यात आले. एरव्ही बक्कळ नफा कमवणाऱ्या ॲप आधारित टॅक्सी सेवा कंपन्यांनी किमान नैसर्गिक आपत्तीच्या वेळी ना नफा ना तोटा दरात सेवा देणे गरजेचे आहे. मात्र प्रत्यक्षात वाजवी दरापेक्षा अधिक पैसे आकारून प्रवाशांची लूट करत आहेत. ॲप आधारित टॅक्सी सेवेवर सरकार नियंत्रण ठेवणार कधी, असा प्रश्न ही या निमित्ताने प्रवासी गणेश श्रीखंडे यांनी उपस्थित केला आहे. मिळेल त्या वाहनाने प्रवास करताना प्रवाशांची दयनीय अवस्था दिसून आली होती.