जिल्ह्यात नांदेडसह सर्वच तालुक्यात मागील चार दिवसा पासून पावसाची रिपरिप आहे. शनिवारी रात्री हिमायतनगर, कंधार, किनवट, माहूर, लोहा यार तालुक्यात मुसळधार पाऊस बरसला. पैंनगंगा नदीला आलेल्या पुरामुळे हिमायतनगर मध्ये शेती पिकाचे मोठे नुकसाने झाले. रविवारी रात्री मुखेड तालुक्यातील काही गावात ढगफुटी सदृश्य पाऊस झाला. लेंडी प्रकल्प ओव्हर फ्लो होऊन पाणी शिरल्याने भिंगोली, भेंडेगाव, हसनाळ, रावणगाव, भासवाडी, सांगवी भादेव आदी गावांना वेढा घातला आहे. गावात पूर आल्याने चाळीसहून अधिक जनावरे दगावल्याची माहिती आहे.
मराठवाड्याला पावसाचा मार; पाच जिल्ह्यांना झोडपले, दोन महिलांचा मृत्यू, कुठे-कशी परिस्थिती? जाणून घ्या…
दुसरीकडे गावात पूर आल्याने गावकऱ्यांनी जीव वाचवण्यासाठी काही जण झाडावर, मस्जिदीवर आणि घरावील छत, पत्रावर अडकून पडले होते. सकाळी एनडीआरएफ, एसडीआरएफ, अग्निशमन दल, क्यूआरटी, पोलीस दल गावात पोहचून बचाव कार्य सुरु केले.आता पर्यंत २०० जनाना पुराच्या पाण्यातून बाहेर काढून त्यांना सुरक्षित स्थळी हलवण्यात आले आहे. शंभर नागरिक अडकले असून बचावकार्य सुरु असल्याची माहिती आहे. १५ तास उलटून ही गावात बचाव कार्य सुरु आहे. दरम्यान हसनाळ येथील पिराजी म्हैसाजी थोटवे, चंद्रकला विठ्ठल शिंदे, ललिताबाई भोसले, भीमाबाई हिरामन मादाळे, गंगाबाई गंगाराम मादाळे हे बेपत्ता होते, त्यापैकी भीमाबाई मादाळे आणि गंगाबाई गंगाबाई मादाळे, ललिताबाई भोसले यांचा मृतदेह सायंकाळी शोधकार्य दरम्यान आढळला आहे.

जिल्ह्यातील नऊ मंडळांत अतिवृष्टी

नांदेड जिल्ह्यात चौथ्या दिवशीही पावसाचा कहर कायम असून गेल्या २४ तासात ९ महसुली मंडळात अतिवृष्टीची नोंद झाली आहे. मुखेडमधील बा-हाळी मंडळात ३५४.७५, मुक्रामाबाद २०६, देगलूरमधील मरखेल १५८, मालेगाव १२७.२५, हनेगाव १५८, किनवटमधील इसापूर १२०.२५, जलधारा ९०.७५, शिवणी ८०, नायगावमधील कुंटूर ७१.२५ मिली मीटर इतका पाऊस झाला आहे. जिल्हयात एकुण ३८.२० मिमी पाऊस झाला असून आत्तापर्यंत ५७९.३० मिली मीटर पावसाची नोंद झाली आहे.

मुख्यमंत्र्यांनी घेतला पूर परिस्थितीचा आढावा

मुख्यमंत्री देवेंद्र फडणवीस यांनी आज मंत्रालयातील राज्य आपत्ती व्यवस्थापन कक्षात नांदेडसह संपूर्ण राज्यातील पावसाच्या स्थितीचा आढावा घेतला. सर्व विभागीय आयुक्त, सर्व जिल्हाधिकारी व्हिडिओ कॉन्फरन्सिंगच्या माध्यमातून यात सहभागी झाले. सर्व विभागीय आयुक्तांनी त्यांच्या विभागातील माहिती यावेळी सादर केली.यावेळी नांदेड जिल्ह्यातील मुखेड तालुक्यातील पूर परिस्थितीची माहिती घेतली. निवारा केंद्रात राहणाऱ्या नागरिकांना भोजन, शुद्ध पाणी, पांघरूण इत्यादी सोयी प्राधान्याने द्या, असेही मुख्यमंत्री फडणवीस यांनी निर्देश दिले. मुखेडमधील परिस्थिती आता नियंत्रणात आहे. विष्णुपुरीकडे लक्ष देण्यास सांगण्यात आले. शिवाय अलर्ट राहण्याच्या सूचना त्यांनी अधिकाऱ्यांना दिले.

विष्णुपुरी प्रकल्पाचे दहा दरवाजे उघडले

नांदेड जिल्ह्यात मागील तीन ते चार दिवसा पासून सातत्याने पाऊस सुरु आहे. विष्णुपुरी प्रकल्प शंभर टक्के भरल्याने प्रकल्पाचे दहा दरवाजे उघडण्यात आले आहे. विष्णुपुरी प्रकल्पातुन जवळपास १ लाख ४ हजार ८८२ क्यूसेस इतक्या वेगाने गोदावरी नदी पात्रात पाण्याचा विसर्ग सुरु आहे. गोदावरी नदी दुथडी भरून वाहत असून गोवर्धन घाट येथील स्मशानभूमी च्या काठापर्यंत पाणी पोहचले आहे. सद्या विष्णुपुरी प्रकल्पात पाण्याची आवक सुरु आहे, त्यामुळे प्रकल्पाचे आणखी काही दरवाजे उघडण्याची शक्यता आहे. एवढ्या मोठ्या प्रमाणात दरवाजे उघडण्याची पहिली वेळ आहे. दरम्यान गोदावरी नदी दुथडी भरून वाहत असल्याने जिल्हा प्रशासनाने नदी काठच्या नागरिकांना सतर्कतेचा इशारा दिला आहे.