भाऊसाहेबनगर (ता. निफाड) येथील निफाड साखर कारखान्याच्या कार्यस्थळावर निसाका कामगार, सभासद आणि शेतकऱ्यांची महत्त्वपूर्ण बैठक झाली. गेल्या काही दिवसांपासून ‘निसाका’बाबत वेगवेगळ्या चर्चा तालुक्यात सुरू असल्याने कारखाना कामगार आणि सभासदांमध्ये संभ्रम पसरला असून, जिल्हा बँक सदर कारखाना विक्री करणार असल्याची चर्चा कामगार आणि सभासदांमध्ये असल्याने तालुक्यात संतापाची लाट उसळली आहे. त्या अनुषंगाने या विषयावर चर्चा करण्यासाठी ही बैठक बोलावली असल्याची माहिती कामगार संघटनेचे सरचिटणीस बी. जी. पाटील यांनी दिली.
घोटीत धावत्या रेल्वेखाली दाम्पत्याने संपवलं जीवन, घटनेनं एकच खळबळ, का घेतला टोकाचा निर्णय?
कामगारांना मार्गदर्शन करताना पाटील म्हणाले की, जोपर्यंत कामगारांचे ८१ कोटी ९४ लाख रुपये कामगारांना देत नाही व सभासदांना ठेवी परत करीत नाही, तोपर्यंत हा कारखाना विक्री करू दिला जाणार नाही. अन्यथा आम्ही सामूहिक आत्महत्या करू, किंवा गेटवर फाशी घेऊ. कामगार संघटनेचे कार्याध्यक्ष प्रमोद गडाख, सभासद खंडू बोडके, लहू मोरे, नानासाहेब दाते, गोकुळ झाल्टे, अमित ताजणे, सोमनाथ झाल्टे यांनी हा कारखाना जिल्हा बँकेला विक्री करू दिला जाणार नाही, कारखाना वाचवण्यासाठी सर्व लोकप्रतिनिधींनी मतभेद विसरून पुढाकार घ्यावा, असे आवाहन यावेळी करण्यात आले.

बैठकीला तानाजी पूरकर, बाळासाहेब बागस्कर, सुभाष जोमन, विजय रसाळ, विष्णुपंत मत्सगार, पुंडलिक ताजणे, शिवाजी मोरे, नितीन निकम, सचिन आढाव, किरण वाघ, केशव झाल्टे, पंढरीनाथ उगले, उत्तम गायकवाड, नानासाहेब बोरस्ते, सिताराम मोरे, विजय रसाळ आदींसह पिंपळस, कसबे सुकेणे, मौजे सुकेणे, वडाळी, शिरजगाव, चांदोरी, सायखेडासह गोदाकाठच्या विविध गावांमधून सभासद उपस्थित होते.