मुख्यमंत्री फडणवीस आणि अमित शहा यांच्यात २० मिनिटं चर्चा झाली. फडणवीस भाजप अध्यक्ष जे. पी. नड्डा, संरक्षण मंत्री राजनाथ सिंह आणि ऊर्जा मंत्री मनोहर खट्टर यांनादेखील भेटले. शहा आणि फडणवीस यांच्या भेटीत महायुती सरकारमधील मंत्र्‍यांच्या गेल्या ६ महिन्यांमधील कामगिरीवर चर्चा झाल्याची सुत्रांची माहिती आहे. अकार्यक्षम आणि वादग्रस्त मंत्र्‍यांना नारळ दिला जाण्याची दाट शक्यता आहे. काही मंत्र्‍यांचे विभाग भ्रष्टाचारांमुळे चर्चेत आहेत. त्या मंत्र्‍यांनादेखील बाहेरचा रस्ता दाखवला जाऊ शकतो, अशी माहिती सुत्रांनी दिली.

महायुती सरकारमधील अनेक मंत्र्‍यांची गच्छंती होण्याची दाट शक्यता आहे. शिवसेनेचे मंत्री संजय शिरसाट, राष्ट्रवादी काँग्रेसचे मंत्री माणिकराव कोकाटे यांची हकालपट्टी निश्चित मानली जात आहे. शिरसाट यांचा बेडरुममधील व्हिडीओ समोर आला. त्यात त्यांच्याजवळ पैशांनी भरलेली बॅग दिसत होती. त्यांच्या मुलाला हॉटेल खरेदी करता यावं यासाठी पात्रतेच्या अटी बदलण्यात आल्याचे आरोप झाले. शिरसाट यांना प्राप्तिककर विभागाची नोटिसही आलेली नाही. तर दुसरीकडे मंत्री कोकाटे विधान परिषदेत मोबाईलवर रम्मी खेळत असल्यानं अडचणीत आले. त्यांची अनेक विधानं वादग्रस्त ठरलेली आहेत.

संजय शिरसाट, माणिकराव कोकाटे यांच्यासह शिवसेनेचे मंत्री संजय राठोड, भरत गोगावले, योगेश कदम, राष्ट्रवादी काँग्रेसचे मंत्री नरहरी झिरवळ, भाजपचे मंत्री गिरीश महाजन यांनाही मंत्रिपदावरुन दूर केलं जाऊ शकतं. महाजन हे मुख्यमंत्री देवेंद्र फडणवीस यांचे अतिशय जवळचे म्हणून ओळखले जातात. ते उत्तर महाराष्ट्रातील भाजपचे प्रमुख नेते आहेत.
राहुल नार्वेकर यांना मंत्री होण्याची इच्छा आहे. त्यामुळे त्यांना मंत्रिमंडळात स्थान मिळू शकतं. त्यांच्या जागी भाजपचे वरिष्ठ नेते आणि माजी मंत्री सुधीर मुनगंटीवार यांची विधानसभा अध्यक्षपदी वर्णी लागू शकते. याबद्दल नार्वेकर यांना विचारलं असता, विधानसभेचा अध्यक्ष म्हणून मी समाधानकारक काम केलेलं आहे. पक्ष देईल ती जबाबदारी स्वीकारण्यास मी तयार आहे, असं उत्तर त्यांनी दिलं.