गृहराज्यमंत्री आणि शिवसेना नेते योगेश कदम यांना गोत्यात आणणारे काही योगायोग अतिशय आश्चर्यजनक आहेत. २ तारखा, २ बार आणि २ शहरं असे योगायोग या सगळ्या घटनाक्रमात आहेत. नवी मुंबईतील वाशीमध्ये असलेल्या २८ मेच्या रात्रीच्या सुमारास धाड पडली. गृहराज्यमंत्री योगेश कदम यांच्या सूचनेवरुन ही धाड टाकण्यात आली. कोणताही परवाना नसताना द रेस नावाचा बार मध्यरात्रीपर्यंत सुरु होता. बारमध्ये मोठ्या आवाजात संगीत वाजवलं जात होतं. अतिशय आक्षेपार्ह कपडे घातलेल्या अनेक महिला ग्राहकांच्या समोर अश्लील नाचत असल्याचं या धाडीतून पोलिसांच्या लक्षात आलं.

बारवर पडणाऱ्या धाडी तशा नवीन नाहीत. पण द रेसवरील धाडीमुळे नवी मुंबईत एकच खळबळ उडाली. कारण ही कारवाई गृहराज्यमंत्री योगेश कदम यांच्या आदेशावरुन झाली होती. त्यांच्या निकटवर्तीयांचा धाडीत सहभागी होता. त्यामुळे या सगळ्या कारवाईबद्दल शंका उपस्थित करण्यात आली. कारवाईमागील हेतूविषयी संशय व्यक्त करण्यात आला. नवी मुंबईत वरिष्ठ पोलीस अधिकारी वर्गात खळबळ उडाली. बार व्यावसायिक वर्गातही घबराट पसरली.

द रेस बारवरील कारवाईचा साद्यंत तपशील नवी मुंबई पोलिसांनी गृहमंत्री असलेल्या देवेंद्र फडणवीस यांना दिला. यानंतर दोनच दिवसांनी म्हणजेच ३० मे रोजी मुंबईच्या पश्चिम उपनगरात असलेल्या कांदिवलीतील बारवर कारवाई करण्यात आली. मुंबई पोलिसांच्या क्राइम ब्रांचनं सावली बारवर धाड टाकली. विशेष म्हणजे सावली बार हा समता नगर पोलीस ठाण्यापासून अवघ्या ५० मीटरवर आहे. त्यामुळे तिथे चालणाऱ्या गोष्टींची पोलिसांना इतक्या महिन्यांपासून कल्पना नव्हती, असं म्हणता येणार नाही. हा बार गृहराज्यमंत्री योगेश कदम यांच्या मातोश्रींच्या मालकीचा आहे, याची कल्पना पोलिसांना नव्हती, असं तरी अजिबातच म्हणता येत नाही.

क्राइम ब्रांचनं अतिशय पद्धतशीरपणे सावली बारवर छापा टाकला. कोणते अधिकारी कुठे उभे राहणार नाही, ग्राहक म्हणून कोण जाणार, कोणता अधिकारी रेकॉर्डिंग करणार याचं सगळं नियोजन करुन पोलिसांनी धाड टाकली. स्टेजवर ५ बारबाला आणि ३ गार्ड्स असावेत, असा नियम असताना तिथे २२ बारबाला होत्या. त्या ग्राहकांशी लगट करत अश्लील नृत्य करत असल्याचा प्रकार पोलिसांच्या धाडीतून समोर आला. या प्रकरणात गुन्हा दाखल झाला. तेव्हापासून बार बंद आहे.

सावली बारवर ३० मेच्या रात्री छापा पडला. तेव्हा हे प्रकरण फारसं चर्चेत आलं नाही. पण पावसाळी अधिवेशनाच्या शेवटच्या दिवशी विधान परिषदेत शिवसेना उबाठाचे आमदार अनिल परब यांनी सावली बारवरील छाप्याचा विषय मांडत कदमांना लक्ष्य केलं. दोन महिन्यांपूर्वी झालेल्या कारवाईवरुन अचानक गहजब कसा झाला, अनिल परब यांच्याकडे ती माहिती कोणी पोहोचवली, गृहराज्यमंत्र्यांच्या मातोश्रींच्या बारवर छापा टाकण्याचं धाडस पोलिसांनी कसं केलं, त्यांना कोणाच्या सूचना होत्या, याबद्दलची माहिती समोर आलेली नाही. पण या सगळ्या प्रकरणातील योगायोग अतिशय रंजक आहेत. राजकारणात योगायोगानं काहीही घडत नसतं, याची आठवण करुन देणारे आहेत.