‘या’ गुन्ह्यात वाढ करून मोक्का कलम वाढवले

मोक्का अंतर्गत कारवाई झालेले संशयीत आरोपी 2 जुलैला दुपारी अडीच वाजेच्या सुमारास, मौलाना आझाद चौक, नई जिदंगी येथे, सोहेल रमजान सय्यद यांस मारहाण करत होते. सोहेल सय्यद यांनी संशयीत आरोपींना दिलेले उसणे पैसे परत मागितले होते. या कारणावरून, संशयीत आरोपी जाफर शेटे, टिपु सालार, फैसल सालार, पापड्या, अक्रम पैलवान आणि त्यांच्यासोबत असलेल्या इतर 3 ते 4 इसमांनी फिर्यादीस लाथाबुक्क्याने मारहाण केली होती.फैसल सालार याने, फिर्यादीस “मैं इधर का भाई हुँ.. कोई आगे आया तो उसे खल्लास कर दूंगा..” असे म्हणून, चाकूच्या सहाय्याने धमकावले. फैसल सालार याने, त्याच्या हातातील चाकुने फिर्यादीच्या पोटात खुपसून जीवे ठार मारण्याचा प्रयत्न केला, अशी फिर्याद एमआयडीसी पोलीस ठाण्यात दाखल आहे.

एमआयडीसी पोलीस ठाण्यात गुन्हा दाखल

सोलापूर शहरात संघटित टोळक्याने नई जिंदगी येथे दहशत निर्माण करून धुमाकूळ घातला आणि जीवे ठार मारण्याचा प्रयत्न केल्याचा एमआयडीसी पोलीस ठाण्यात गुन्हा दाखल झाला होता. सोलापूर पोलिसांनी सर्व संशयीत आरोपींचा मागील वर्षांपासून दाखल झालेल्या गुन्ह्यांचा इतिहास पाहून संघटित गुन्हेगारी कलमाअंतर्गत मोक्का कारवाई केली आहे. संशयीत आरोपी विरोधात 2 जुलै रोजी दिलेल्या तक्रारीवरून एमआयडीसी पोलीस ठाण्यात भारतीय न्याय संहिता कलम 109,189(1), 189 (2), 189(4),191(1), 191(2),191(3),190,351(2) (3),49 सह भारतीय हत्यार कायदा कलम 4/25 सह फौजदारी सुधारणा कायदा कलम 7 सह महाराष्ट्र पोलीस कायदा कलम 37 (1) (3), 135,142 प्रमाणे गुन्हा दाखल आहे.

दहा वर्षांपासून संघटित गुन्हेगारी; म्हणून मोक्का कारवाई

2015 ते सन-2025 या दहा वर्षांच्या कालावधीत संघटित गुन्हेगारी टोळीचा सदस्य या नात्याने, स्वतःचे अथवा टोळीचे अवैध आर्थिक फायद्यासाठी, तसेच परीसरात वर्चस्व कायम राखण्यासाठी, हिंसाचाराचा वापर करुन, 03 वर्ष किंवा त्यापेक्षा जास्त शिक्षा असलेले, खुनाचा प्रयत्न, खंडणी, अपहरण, गंभीर दुखापत करणे, जीवे ठार मारण्याची धमकी देणे यासारखे 07 दखलपात्र गुन्हे केले होते. संशयीत आरोपी एकाच टोळीचे सदस्य असल्याचे निष्पन्न झाले आहे. सोलापूर पोलीस आयुक्त एम राजकुमार यांनी त्यानुसार सदर गुन्ह्यामध्ये, महाराष्ट्र संघटित गुन्हेगारी नियंत्रण अधिनियम 1999 चे कलम 3(1) (ii), 3(2),3(4) या कलमांची (मोक्का कायदयाची) वाढ केली आहे. सदर गुन्हयाचा पुढील तपास सहायक पोलीस आयुक्त राजन माने हे करत आहेत.