महाराष्ट्र नवनिर्माण सेनेने मुंबई महानगरपालिका निवडणुकीच्या अनुषंगाने नवे बदल करत आठ नव्या विभाग अध्यक्षांच्या नियुक्त्या जाहीर केल्या आहेत. मनसेचे मुंबई अध्यक्ष संदीप देशपांडे यांनी पत्रकार परिषद घेत यासंदर्भात घोषणा केली.

राज ठाकरे यांच्या आदेशावरून जे कोणी काम नाही करत त्यांच्या जागी पर्याय सुचवा अशा सूचना नव्या केंद्रीय समितीला देण्यात आल्या होत्या. याच मुद्द्यावर केंद्रीय समितीने विभागवार आढावा घेऊन पक्षाची परिस्थिती, काम करणारे पदाधिकारी यांचा आढावा घेऊन अहवाल दाखल केला आहे. या अहवालात जुन्या नियुक्त्या रद्द करत नव्या नियुक्त्यांवर आज शिक्कामोर्तब करण्यात आले आहे.

कोणाकोणाची नियुक्ती?

प्रदीप वाघमारे – कुर्ला विधानसभा विभाग अध्यक्ष
रवींद्र शेलार – अणुशक्तीनगर विधानसभा अध्यक्ष
महेश फरकासे – कांदिवली पूर्व विधानसभा विभाग अध्यक्ष
दीपक आर्य – जोगेश्वरी विधानसभा विभाग अध्यक्ष
पांडुरंग राणे – दहिसर विधानसभा विभाग अध्यक्ष
विश्वास मोरे – बोरिवली विधानसभा विभाग अध्यक्ष
अनिल पंडित राजभोज – भांडुप विधानसभा विभाग अध्यक्ष,
दिनेश पुंडे – मलबार हिल विधानसभा विभाग अध्यक्ष

मेळावा पुढे ढकलला

दरम्यान, रविवार 27 जुलै रोजी सायंकाळी मुंबईतील वांद्रे पश्चिम भागातील रंगशारदा सभागृह येथे राज ठाकरे यांच्या प्रमुख उपस्थितीत आयोजित महाराष्ट्र नवनिर्माण सेनेचा पदाधिकारी मेळावा काही कारणास्तव तो पुढे ढकलण्यात आला आहे, अशी माहिती मनसे नेते शिरीष सावंत यांनी दिली आहे. मुंबईतील सर्व नेते, सरचिटणीस, सचिव, उपाध्यक्ष, महिला-पुरुष विभाग अध्यक्ष, महिला-पुरुष उपविभाग अध्यक्ष, महिला-पुरुष शाखा अध्यक्ष तसेच मुंबईतीलच सर्व अंगिकृत संघटनांचे प्रमुख पदाधिकारी यांचा हा मेळावा आयोजित करण्यात आला होता. मेळाव्याची पुढील तारीख लवकरच कळवली जाणार आहे.