पुणे येथील विश्वास इंटरप्राईजेस आणि ट्रान्सपोर्टच्या मालकीचा ट्रक हा पुणे येथील हडपसरमधून 40 लाख रुपये किंमतीची ग्रीन लेबल ही दारू घेऊन नागपूरकडे जात होता. एन डी जे लिक्विड्स प्रायव्हेट लिमिटेड येथे ही दारू पोहोचवायची होती. मात्र ट्रकचालक नागपूरकडे न जाता पुसद शहरात पोहोचला. तिथे माहूर मार्गावर एका मोकळ्या ठिकाणी ट्रक उभा करून दारू विक्री करू लागला. तीन दुचाकीवरून आलेल्या सहा जणांनी सहा पेट्या दारू खरेदी केली.

याबाबत पुसद पोलिसांना कळतच त्यांनी मनीष सुरळे, राजेश्वर पवार, सचिन चव्हाण, गोकुळ चव्हाण, विक्रम जाधव प्रवीण जोहरे यांना ताब्यात घेतले आहे. या वाहनावर राज्यमंत्री मेघना दीदी साकोरे बोर्डीकर असे ठळकपणे मोठे स्टिकर लावले होते. ट्रकमालक कोहकाडे हे राज्यमंत्री बोर्डीकर यांचे नातेवाईक असल्याचे चालकाने यावेळी सांगितले. त्यामुळे आता राज्यभर खळबळ उडाली आहे. मंत्र्याच्या नावाचे स्टिकर लावून अवैद्य दारू वाहतूक करून विकली जात असल्याचा गंभीर प्रकार समोर आला आहे.

या घटनेच्या आता राजकीय पडसाद उमटत आहेत. बोर्डीकरांचे कट्टर विरोधक असणारे राष्ट्रवादी काँग्रेसचे माजी आमदार विजय भांबळे यांनी यामध्ये आता उडी घेतली आहे. राज्यमंत्री मेघना बोर्डीकर यांनी आपल्या पदाचा दुरुपयोग सुरू केला आहे. राज्यमंत्री बोर्डीकर यांच्याच आशीर्वादाने अवैद्य दारू राज्यभरात विकली जात असल्याचा संशय देखील माजी आमदार भांबळे यांनी व्यक्त केला आहे. एवढ्यावरच ते थांबले नाहीत तर राज्यमंत्री बोर्डीकर ज्या जिंतूर मतदारसंघतून निवडून आले आहेत त्या जिंतूर शहरांमधून राज्यभरात अवैद्य गुटखा वितरित होत असल्याचा गंभीर आरोप देखील भांबळे यांनी केला आहे. जिंतूर शहरातून राज्यभर अवैध गुटखा विक्री करणारे हे भाजपचे पदाधिकारी असून राज्यमंत्री बोर्डीकरांचे जवळचे कार्यकर्ते असल्याचेही भांबळे म्हणाले. या संपूर्ण प्रकाराची एसआयटीमार्फत चौकशी व्हावी अशी मागणी देखील मुख्यमंत्र्यांकडे करणार असल्याचे विजय भांबळे म्हणाले.

राज्यमंत्री मेघना बोर्डीकर या मंत्री पदाचा वापर सर्वसामान्यांचे प्रश्न सोडविण्यासाठी करत नाहीत. त्या ज्या खात्याच्या मंत्री आहेत त्या ऊर्जा खात्याचा बोजवारा परभणी जिल्ह्यात उडाला आहे. आजही जिल्ह्यात तीन-तीन, चार-चार दिवस लाईट जाते. शेतकऱ्यांना डीपी मिळत नाही, अशी परिस्थिती आहे. तर आरोग्य विभागाचा कारभार देखील ढासळला आहे, अशी टीका भांबळे यांनी केली. तर दुसरीकडे याच मंत्रीपदाचा गैरवापर करून अवैध धंद्यांना हातभार लावण्याचे काम त्या करत असल्याचा आरोप देखील भांबळे यांनी केला आहे.

भांबळे बोर्डीकर वादामुळे आता महायुतीत पडणार ठिणगी?

राज्यमंत्री मेघना बोर्डीकर या भाजप पक्षाच्या नेत्या आहेत. तर माजी आमदार विजय भांबळे यांनी नुकताच राष्ट्रवादी शरद पवार गटातून अजित पवार गटामध्ये प्रवेश केला आहे. त्यामुळे दोघेही महायुती सरकारमध्ये आहेत. असे असले तरी माजी आमदार विजय भांबळे यांनी राज्यमंत्री मेघना बोर्डीकरांवर गंभीर आरोप केले आहेत. त्यामुळे जिल्ह्यामध्ये आता महायुतीमध्येच बेबनाव निर्माण झाल्याचे दिसून येत आहे. तर येणाऱ्या काळात याच भागात राष्ट्रवादी विरुद्ध भाजप असा संघर्ष देखील पाहावयास मिळण्याची शक्यता आहे.