पोलिसांनी दिलेल्या माहितीनुसार, कन्हाई बिस्वास (वय 65, रा. कोलकाता) यांचे पुण्यात निधन झाले होते. त्यांच्या मृतदेहासोबत त्यांचा मुलगा अबीर बिस्वास (वय 30) आणि त्यांचा नातेवाईक पंकज बिस्वास (वय 40) हे दोघे रुग्णवाहिकेने कोलकात्याकडे निघाले होते. रुग्णवाहिकेचे चालक शिवाजी खल्लू भांबुरे (वय 45, रा. पुणे) होते.

प्रवासादरम्यान नागपूरजवळील भारत पेट्रोल पंपाजवळ रुग्णवाहिकेमध्ये अचानक बिघाड झाला. त्यामुळे मृतकाचा मुलगा अबीर बिस्वास रस्ता ओलांडून मेकॅनिक शोधण्यासाठी गेले होते. दरम्यान, एका भरधाव अज्ञात वाहनाने रस्त्याच्या कडेला उभ्या असलेल्या अ‍ॅम्ब्युलन्सला जोरदार धडक दिली. धडक इतकी जबरदस्त होती की अ‍ॅम्ब्युलन्स रस्त्याच्या कडेला असलेल्या सुमारे 25 फूट खोल खड्ड्यात जाऊन कोसळली.

या अपघातात रुग्णवाहिकेत असलेले पंकज बिस्वास आणि चालक शिवाजी भांबुरे गंभीर जखमी झाले. स्थानिक नागरिकांनी तत्काळ घटनास्थळी धाव घेतली. जखमींना मेडिकल कॉलेज रुग्णालयात हलवले. मात्र, उपचार सुरू होण्यापूर्वीच दोघांचा मृत्यू झाला. यावेळी अबीर बिस्वास हे मेकॅनिक शोधण्यासाठी बाहेर गेल्यामुळे त्यांचा जीव थोडक्यात वाचला, मात्र या दुर्दैवी घटनेमुळे त्यांना प्रचंड मानसिक धक्का बसला आहे.

घटनेनंतर हुडकेश्वर पोलीस ठाण्यात अज्ञात वाहनचालकाविरुद्ध भादंवि कलम 304 अ अन्वये गुन्हा दाखल करण्यात आला आहे. पोलिसांकडून घटनास्थळाजवळील सीसीटीव्ही फुटेज तपासले जात आहे. दोषी वाहनचालकाचा शोध घेतला जात आहे. ही घटना मृत व्यक्तीच्या अंत्ययात्रेच्याच प्रवासात नवा मृत्यू घडवणारी ठरली आहे. संपूर्ण कुटुंबावर दुःखाचा डोंगर कोसळला आहे.