जयसिंगपूरच्या वरेकर कॉलनी परिसरात मनाला चटका लावणारी ही घटना घडली आहे. येथे अडीच वर्षांचा रिदम राय या चिमुकल्याचा नकळतपणे पाणी भरलेल्या खड्ड्यात पडून मृत्यू झाला आहे. मोबाईल टॉवरसाठी खोदण्यात आलेला हा खड्डा उघडा ठेवण्यात आला होता. याच खड्ड्यात पडून त्याचा मृत्यू झाला आहे.
Pune Accident: टँकरची दुचाकीला जोरदार धडक, तरुण-तरुणीचा तडफडून अंत, पुण्यातील हृदयद्रावक घटना, पाहणारे सुन्न

नेमकं काय घडलं?

मिळालेल्या प्राथमिक माहितीनुसार, वरेकर कॉलनीतील चांदणे कुटुंबीयांच्या जागेवर इंडस कंपनीकडून मोबाईल टॉवर उभारणीचं काम सुरू आहे. यासाठी अंदाजे 10 फूट खोल खड्डा खोदण्यात आला होता. मात्र, प्रशासनाच्या दुर्लक्षामुळे तो खड्डा अनेक दिवसांपासून उघडाच ठेवण्यात आला होता. पावसामुळे त्या खड्ड्यात पाणी साचलेले आहे. बुधवारी सकाळच्या सुमारास चिमुकला घराजवळ खेळत असताना अचानक त्या खड्ड्यात पडला. पाण्यात बुडाल्यामुळे त्याचा जागीच दुर्दैवी मृत्यू झाला. विशेष म्हणजे, चिमुकल्याच्या आईवर शनिवारी शस्त्रक्रिया उपचार होणार आहेत. त्यामुळे घटना घडली त्यावेळी आई सांगली सिव्हिल हॉस्पिटलमध्ये काही रिपोर्ट्स आणण्यासाठी गेली होती. ती परत आल्यावर या घटनेची माहिती तिला देण्यात आली. त्यामुळे आईने केलेला आक्रोश हृदय पिळवटून टाकणार होता.

दुर्घटनेची माहिती मिळताच जयसिंगपूर पोलिसांनी तातडीने घटनास्थळी धाव घेतली. अडीच वर्षीय चिमुकल्याचा मृतदेह खड्ड्यातील पाण्यातून बाहेर काढत जयसिंगपूर प्राथमिक आरोग्य केंद्रात शवविच्छेदनासाठी पाठवण्यात आला आहे. तर पुढील तपास पोलिसांकडून सुरु आहे.

दरम्यान, इंडस कंपनी आणि संबंधित कंत्राटदाराच्या हलगर्जीपणामुळे ही दुर्दैवी घटना घडल्याचा आरोप होत आहे. त्यामुळे जबाबदारांवर कारवाई होणार का? आणि अशा घटना रोखण्यासाठी स्थानिक प्रशासन कोणती ठोस पावलं उचलणार? याकडे आता नागरिकांचे लक्ष लागले आहे.