संजय गायकवाड- बुलढाण्याचे आमदार असलेले संजय गायकवाड सातत्यानं त्यांच्या विधानांमुळे वादात असतात. अधिवेशन काळात त्यांनी आमदार निवासातील कँटिनमध्ये जाऊन अन्नपदार्थांच्या दर्जावरुन मारहाण केली. टॉवेल आणि बनियनमध्ये कँटिनला गेलेले आणि मारहाण करणारे संजय गायकवाड संपूर्ण देशानं पाहिले. कायदे करणारेच कायदे हातात घेऊ लागल्याची चर्चा झाली.

संजय शिरसाट- छत्रपती संभाजीनगरचे आमदार आणि सामाजिक न्यायमंत्री संजय शिरसाट त्यांच्या पुत्रामुळे वादात सापडले. लेकाला हॉटेल खरेदी करता यावं यासाठी लिलावासाठीच्या पात्रता अटीच बदलल्याचा आरोप झाला. त्यावरुन मुख्यमंत्री देवेंद्र फडणवीस यांनी चौकशीचे आदेश दिले. अधिवेशन सुरु असतानाच शिरसाट यांनी त्यांना आयकर विभागाची नोटिस आल्याचं सांगितलं. शिंदेंचे पुत्र आणि खासदार श्रीकांत शिंदे यांनाही नोटिस आल्याचं ते म्हणाले होते. मात्र नंतर त्यांनी घूमजाव केलं.

संजय निरुपम- शिवसेना-काँग्रेस-शिवसेना असा प्रवास करणारे संजय निरुपम जुलैच्या सुरुवातीला मिरारोडमध्ये जाऊन आले. मराठी भाषेवरुन मनसेनं अमराठी दुकानदाराला मारहाण केली होती. अमराठी मतं दुरावू नयेत या हेतूनं निरुपम मिरारोडला गेले. मात्र यामुळे मराठी मतदारांमध्ये चुकीचा संदेश दिला. त्यामुळे मराठी भाषिकांनी काढलेल्या मोर्चात सहभागी होण्यासाठी गेलेल्या मंत्री प्रताप सरनाईकांना रोषाचा सामना करावा लागला. त्यामुळे मोर्चात सहभागी न होता त्यांनी काढता पाय घेतला.

संजय राऊत- एकनाथ शिंदेंनी बंड केल्यापासून संजय राऊत सातत्यानं शिंदे यांना लक्ष्य करत आले आहेत. अधिवेशन काळात शिंदे तडकाफडकी दिल्लीला गेले. त्यावरूनही राऊत यांनी शिंदेंना रडारवर घेतलं. गुरुपौर्णिमा असल्यानं शिंदे केंद्रीय मंत्री अमित शहांना भेटायला गेले होते. आपला पक्ष भाजपमध्ये विलीन करण्याची ऑफर त्यांनी शहांना दिली, असा दावा करत राऊतांनी खळबळ उडवून दिली. ठाकरे बंधूंनी सोबत यावं यासाठीही त्यांचे प्रयत्न सुरु आहेत. शिवसेना उबाठा आणि मनसेची युती झाल्यास त्याचा सर्वाधिक फटका शिंदे यांनाच बसणार आहे.

संजय केळकर- शिंदे यांच्या ठाण्यात राहणारे, भाजपचे आमदार असलेले संजय केळकर गेल्या काही महिन्यांपासून प्रचंड सक्रिय झाले आहेत. ठाण्यातील प्रशासकीय कारभारावर, पालिकेकडून चालणाऱ्या कामांवर ते सातत्यानं बोलत आहेत. पालिकेत झालेल्या भ्रष्टाचाराचा मुद्दा त्यांच्या अजेंड्यावर आहे. विशेष म्हणजे गेल्या अनेक वर्षांपासून ठाणे महापालिकेवर शिंदे यांचं वर्चस्व आहे. शिंदेंच्या वर्चस्वाला बालेकिल्ल्यात शह देण्यासाठी संजय केळकर कामाला लागले आहेत.