नाशिकमध्ये हनी ट्रॅपची चर्चा अनेक दिवसांपासून सुरू आहे. एका मोठ्या सरकारी अधिकाऱ्याला जाळ्यात ओढण्यात आले होते. सुरुवातीला त्याच्याकडून 3 कोटी रुपयांची मागणी केली. ती पूर्ण झाल्यावर पुन्हा 10 कोटी मागितले. त्यामुळे तो अधिकारी घाबरला. अधिकाऱ्याने आणखी रक्कम देण्यास नकार दिल्यानंतर महिलेने पोलिसांकडे तक्रार केली. मात्र आम्ही सामंजस्याने यावर तोडगा काढतो, असं अधिकाऱ्याने सांगितलं.

नाशकात महिला पोलिसाच्या लेकीने संपवलं जीवन; आईला लिहिली शेवटची चिठ्ठी, काळीज चिरणारं कारण समोर…

दरम्यान, तो अधिकारी काही दिवसांनी ठाण्याला गेला. तिथे त्याची तब्येत बिघडली आणि त्याने महिलेविरोधात तक्रार दिली. नंतर पुन्हा दोघांनी समेट केला आणि एकमेकांविरोधातील तक्रारी मागे घेतल्या. दोन्ही बाजूने तक्रारी मागे घेण्यात आल्याने पोलीसही हतबल झाले.

या प्रकरणाची राज्यभर चर्चा होऊ लागल्यानंतर शनिवारी पोलिसांनी नाशिकमधील एका हॉटेलची तपासणी केली. तसंच या हॉटेलमधील रूम सील केल्याची चर्चा आहे. पण नाशिकच्या स्थानिक पोलिसांनी ही बाब नाकारली आहे. शरणपूर भागातील एका जमिनीच्या व्यवहारातून हे हनी ट्रॅप प्रकरण उघडकीस आले. ती जमीन एका ट्रस्टची आहे. यात अनेकांवर गुन्हे दाखल आहेत. त्यात एका काँग्रेस नेत्याचाही हात आहे, अशी चर्चा आहे.

दरम्यान, या हनी ट्रॅपमध्ये 72 अधिकारी आणि नेते अडकल्याची चर्चा आहे. नाना पटोले यांनी विधानसभेत हा विषय मांडला. तसंच एक पेन ड्राईव्ह सादर केला. मात्र “हनीही नाही आणि ट्रॅपही नाही” असं म्हणत मुख्यमंत्री देवेंद्र फडणवीस यांनी हे प्रकरण नाकारलं. त्यानंतर आता पोलिसांकडून छापेमारी सुरू झाल्याने या प्रकरणात आगामी काळात काही अधिकारी आणि नेत्यांबद्दलची माहिती उघड होते का, हे पाहणं महत्त्वाचं ठरणार आहे.