कोकाटे यांनी हे आरोप फेटाळले आहेत. ते रमी नव्हे, तर सॉलिटेअर हा एकल खेळ खेळत असल्याचे स्पष्टीकरण त्यांनी दिले. या घटनेनंतर राजकीय वर्तुळातून प्रतिक्रिया उमटत आहेत. कृषीमंत्र्यांसह सरकारवर तिखट शब्दांत वार केले जात आहेत.

रोहित पवार यांनी कोकाटे यांचा विधानसभेतील एक व्हिडिओ शेअर केला. ज्यामध्ये ते मोबाईलवर एक गेम खेळत असल्याचे दिसत आहेत. यावर रोहित पवार म्हणाले की, ‘सत्ताधारी राष्ट्रवादी गटाला भाजपाशी सल्लामसलत केल्याशिवाय काहीही करता येत नाही. राज्यात रोज आठ शेतकरी आत्महत्या करत असताना, कृषिमंत्र्यांना रमी खेळण्यासाठी वेळ आहे. शेतकऱ्यांना पीक विमा, कर्जमाफी आणि भाव आधाराची गरज आहे, पण मंत्र्यांना याची पर्वा नाही.’ पवारांनी हा ‘शेतकऱ्यांचा अपमान’ असल्याचा उल्लेख केला आहे.

कोकाटे यांनी रोहित पवारांच्या आरोपांना प्रत्युत्तर देताना म्हटले की, मी रमी नाही, तर सॉलिटेअर हा खेळ खेळला होता. रोहित पवारांवर प्रहार करताना ते म्हणाले, ‘रोहित पवारांना रमी खेळण्याची सवय आहे, म्हणून त्यांना वाटले की, मी रमी खेळतोय. माझ्या मोबाइलवर सॉलिटेअर हा गेम माझ्या पीए किंवा ओएसडीने डाउनलोड केला असावा. मी यूट्यूबवर विधानसभेच्या खालच्या सभागृहातील कामकाज पाहत होतो,’ असे स्पष्टीकरण त्यांनी दिलं

यावर मिश्कील प्रत्युत्तर देताना कोकाटे म्हणाले, ‘रमी म्हणजे काय, हे मला माहितच नाही. पवारांना रमी खेळण्याची सवय असावी, म्हणून त्यांनी असा आरोप केला. यूट्यूबवर १० प्रकारच्या जाहिराती येतात, त्या ३० सेकंद पाहाव्या लागतात, स्किपही करता येत नाही.’