संजय देशमुख यांच्या निधनामुळे अजित पवार यांनी दु:ख व्यक्त केले आहे. “मागील दहा वर्षांहून अधिक काळ माझे जनसंपर्क अधिकारी म्हणून उत्कृष्टपणे काम पाहणारे श्री. संजय देशमुख यांच्या आकस्मिक निधनानं अतीव दुःख झालं,” असे अजित पवार म्हणाले. “त्यांच्या जाण्यानं समर्पक आणि सखोल लिखाण करणारा एक विश्वासू, अनुभवी सहकारी मी गमावला आहे. मी त्यांना भावपूर्ण श्रद्धांजली अर्पण करतो. त्यांच्या कुटुंबियांच्या दुःखात मी आणि माझे कुटुंबिय सहभागी आहोत,” अशा शब्दांत त्यांनी आपल्या भावना व्यक्त केल्या.

खासदार होताच उज्ज्वल निकमांची पहिली प्रतिक्रिया, अखेर मनातील खदखद बोलून दाखवलीच…

संजय देशमुख यांच्या निधनामुळे अजित पवार कार्यालयातील लोकांना मोठा धक्का बसला आहे. त्यांचे पत्रकार मित्र संदीप कांबळे यांनी सांगितले की, त्यांनी देशमुख सरांसोबत शुक्रवारी विधानभवनात जेवण केले होते. ती त्यांची शेवटची आठवण ठरली. संदीप कांबळे म्हणाले, “संजय देशमुखसर म्हणजे माझं प्रेरणास्थान… सर, तुम्ही अचानक सोडून गेलात हे मनाला पटत नाही.”

संजय देशमुख हे अनेक पत्रकारांना परिचित होते. ते पत्रकारांना माहिती देऊन मदत करत असत. त्यांनी यापूर्वी मंत्री धनंजय मुंडे यांच्याकडे OSD म्हणून काम केले होते. रत्नागिरी जिल्ह्यात जिल्हा माहिती अधिकारी म्हणून काम करताना त्यांनी पत्रकारांशी चांगले संबंध जोडले होते. अजित पवार यांच्यासारख्या राज्यातील बड्या नेत्यासोबत कार्यरत असतानाही ते कायम प्रसिद्धीपासून कायमच दूर राहिले होते . सातारा जिल्ह्यातील उंब्रज गावचे ते सुपुत्र होते.

ज्येष्ठ पत्रकार राजा आदाटे यांनी संजय देशमुख यांच्यासोबत काम केल्याच्या आठवणी सांगितल्या. “संजय बरोबर दैनिक आज दिनांकमध्ये एकत्र काम करता आले, तो सरकारी सेवेत लागल्यावरही त्याने मैत्री कायम ठेवली होती. वारंवार संपर्क राहायचा. माझ्यासाठी खूपच दुःखद घटना,” असे आदाटे म्हणाले.

दरम्यान, संजय देशमुख मूळचे सातारा जिल्ह्यातील होते. त्यांच्या पश्चात आई-वडील, भाऊ, पत्नी आणि मुलगी असा परिवार आहे. ते सिंधुदुर्ग जिल्ह्याचे जावई होते. त्यांचे पार्थिव सध्या दादरच्या हिंदुजा हॉस्पिटलमध्ये ठेवण्यात आले आहे. उद्या सकाळी साडेआठ वाजता दादर येथे त्यांच्यावर अंत्यसंस्कार करण्यात येणार आहेत.