शनिवारी, 5 जुलै रोजी शंभूराज त्याचे वडील शशिकांत पाटील यांच्यासोबत शेतात गेला होता. त्याचे वडील जनावरांना बांधायला दुसरीकडे गेले तेव्हा शंभूराज एका झाडाखाली खेळत होता. सायंकाळी 5 वाजता वडील परत आले, तेव्हा शंभूराज तिथे नव्हता. त्यानंतर कुटुंबीयांनी आणि गावकऱ्यांनी त्याला खूप शोधले, पण तो सापडला नाही.

पोलिसांनी तातडीने शोधकार्य सुरू केले. आयुष हेल्पलाइनची टीम आणि रेस्क्यू फोर्स यांनीही मदत केली. त्यांनी पाडळी, धामणी आणि आसपासच्या परिसरात शोध घेतला. शेत, डोंगर आणि प्रत्येक संभाव्य ठिकाणी तपासणी केली. तरीही शंभूराज सापडला नाही. त्यामुळे गावात भीतीचे वातावरण होते. आज सकाळी नेताजी सदाशिव पाटील यांना शंभूराज एका म्हसोबा मंदिरात खेळताना दिसला. हे मंदिर संभाजी यशवंत पाटील यांच्या शेतात आहे. त्यांनी लगेच गावकऱ्यांना आणि पोलिसांना माहिती दिली. शंभूराज सुखरूप आहे हे पाहून सगळ्यांना आनंद झाला.

दारं सताड उघडी, घरात एकट्या विवाहितेला गाठून भयंकर कृत्य, धक्कादायक घटनेनं सातारा हादरलं!

पोलिस निरीक्षक सोमनाथ वाघ यांच्या नेतृत्वाखाली पोलिसांनी घटनास्थळी धाव घेतली. शंभूराजची वैद्यकीय तपासणी केली. तो पूर्णपणे ठीक आहे, असे डॉक्टरांनी सांगितले. “शंभूराज तीन दिवस कुठे होता आणि तो मंदिरापर्यंत कसा पोहोचला, याबाबत आम्ही अधिक तपास करत आहेत,” असे पोलिसांनी सांगितले.

गावकऱ्यांनी या शोधकार्यात पोलिसांना खूप मदत केली. शंभूराज सापडल्याने गावात आनंदाचे वातावरण आहे. कुटुंबीयांनी पोलिस, रेस्क्यू पथक, आयुष हेल्पलाइन आणि गावकऱ्यांचे आभार मानले. पोलिस निरीक्षक सोमनाथ वाघ यांनी पालकांना लहान मुलांची काळजी घेण्यास सांगितलं आहे.