नवी मुंबईच्या नेरुळ परिसरात एक धडकी भरवणारी घटना उघडकीस आली. इथं एका तरुणाला रेल्वेवर चढून स्टंटबाजी करणं चांगलंच महागात पडलं आहे. तो स्थानकात उभ्या असलेल्या रेल्वेवर चढून रील बनवत असताना भयंकर घडलं. त्याच्या एका चुकीमुळे त्याच्या अंगाची सगळी कातडी निघाली आहे. गंभीर अवस्थेत त्याला रुग्णालयात दाखल करण्यात आलं आहे. त्याच्यावर आता उपचार सुरू आहेत.

आरव श्रीवास्तव (१६ वर्षे) असं जखमी झालेल्या मुलाचं नाव आहे. तो नेरुळ रेल्वे स्थानकाजवळ रील बनवत असताना गंभीररित्या जखमी झाला आहे. ही घटना राजीव गांधी ब्रिजखाली उभ्या असलेल्या रेल्वे गाडीजवळ घडली. बेलापूरला राहणारा आरव आणि त्याचे ३ मित्र या रेल्वे गाडीवर उभे राहून रील शूट करत होते. रील शूट करत असताना अचानक आरवचा हात ओव्हरहेड वायरला लागला. ओव्हरहेड वायरमधून हाय होल्टेज करंट वाहत असल्याने आरव क्षणात गंभीर जखमी झाला. त्याच्या अंगावरची सगळी कातडी भाजली गेली आहे. यानंतर मित्रांनी त्याला तातडीने ऐरोलीतील बर्न रुग्णालयात दाखल केले. सध्या त्याच्यावर उपचार सुरू आहेत. या घटनेची महिती रेल्वे पोलिसांनी देण्यात आली. रेल्वे पोलीस या घटनेचा अधिक तपास करत आहेत.

रील्स बनवण्याच्या नादात तरुणाई जीव धोक्यात घालत आहे. अपघातासोबतच मृत्यूलाही ते आमंत्रण देत आहेत. पालकांनी याकडे लक्ष देऊन मुलांना याबाबत जागरूक करण्याची गरज अधोरेखित होत आहे.

रील बनवण्यासाठी आणि काही तरी हटके करण्याच्या नादात तरुणाई जीवाशी खेळताना सध्या पाहायला मिळते. रील म्हणजे तरुणाईसाठी व्यसन झाले असून गंभीर बाब म्हणजे आपली मुले रील करतात हे त्यांच्या पालकांनाही माहित असते. तरीही पालकांकडून त्यांना थांबवण्याचे प्रयत्न केले जात नाही असे चित्र आहे. गेल्या काही दिवसात अशा अनेक घटना समोर आल्या आहेत.