केंद्रीय गृहमंत्री अमित शहांच्या उपस्थितीत पुण्यातील कोंडवा येथे जयराज स्पोर्ट्स आणि कन्वेन्शन सेंटरचं उद्घाटन झालं. या सोहळ्यात भाषण करताना शिंदेंनी जय गुजरात अशी घोषणा केली. हाच नारा देत त्यांनी भाषणाचा समारोप केला. त्यानंतर ठाकरेंच्या शिवसेनेनं शिंदे यांच्यावर टिकेची झोड उठवली. त्यावरुन शिंदे यांनी उद्धव ठाकरेंना प्रत्युत्तर दिलं.

जयराज स्पोर्ट्स आणि कन्वेन्शन सेंटरच्या उद्घाटन सोहळ्याला गुजराती समाज मोठ्या संख्येनं उपस्थित होता. त्यामुळे मी जय गुजरात म्हणालो. तिथे राहणाऱ्या गुजराती समाजाच्या पिढ्यानपिढ्यांनी महाराष्ट्राच्या विकासात योगदान दिलेलं आहे. त्यांनी उभारलेल्या प्रकल्पाचा फायदा सगळ्याच सर्वसामान्यांना होणार आहे. मराठी आमचा श्वास आहे आणि हिंदुत्त्व आमचा आत्मा आहे. आमच्यावर टीका करणाऱ्यांनी आधी आरसा पाहावा. जिनके खुद के घर शिशे के होते है, वो दुसरो के घरो पर पत्थर फेका नहीं करते, असा खोचक टोला त्यांनी उद्धव ठाकरेंना लगावला.

यावेळी एकनाथ शिंदेंनी उद्धव ठाकरे ंचा एक व्हिडीओ दाखवला. त्यात उद्धव ठाकरे जय हिंद, जय महाराष्ट्र, जय गुजरात अशी घोषणा भाषण करताना देत होते. २०१९ च्या विधानसभा निवडणुकीआधी आदित्य ठाकरेंचा फोटो असलेला एक बॅनर वरळीत लागला होता. त्यावर केमछो वरळी असा मजकूर होता. त्या बॅनरचा फोटो दाखवत हा काय प्रकार आहे, असा प्रश्न शिंदेंनी विचारला.

उबाठाच्या अधिकृत पेजवर एक पत्र आहे. ते गुजराती भाषेत आहे. त्यावरचा मजकूर तुम्हीच वाचा, असं शिंदे पत्रकारांना म्हणाले. त्या पत्रावर मुंबईमा जलेबी अने फाफडा, उद्धव ठाकरे आपडा, असा मजकूर होता. ‘आम्ही निवडणुका डोळ्यासमोर ठेवून भूमिका घेत नाही. हे निवडणुका दिसल्यावर भूमिका घेतात. आताही यांचं तेच सुरु आहे. आमची नाळ या महाराष्ट्राशी, इथल्या मातीशी जोडली गेलेली आहे. आम्ही सुट्ट्यादेखील इथेच घालवतो,’ असं म्हणत शिंदेंनी ठाकरेंना सणसणीत टोला लगावला.