दुसरीकडे पावसाळ्यात धोकादायक ठरणाऱ्या वसईतील तुंगारेश्वर पर्यटन स्थळावरील अपघातप्रवण क्षेत्र आणि पाण्याचा प्रवाह यामध्ये वनविभागातर्फे पर्यटकांसाठी बंदी घालण्यात आली आहे. पावसाळा सुरू झाल्यानंतर वसईसह इतर भागातील पर्यटकांची पावले समुद्र किनारी, धबधबे, धरणे आणि इतर पर्यटन स्थळी वळू लागतात.

वसईत पावसाळ्यात पर्यटनासाठी अनेक क्षेत्र असून, या ठिकाणी सध्या पडत असलेल्या मुसळधार पावसामुळे पर्यटकांचा ओढा वाढताना दिसत होता. त्यामुळे पावसाळ्यात पाण्याच्या प्रवाहात बुडून मृत्युमुखी पडण्याच्या घटना दरवर्षी समोर येत असतात. त्यामुळे पर्यटनबंदीच्या आदेशाकडे सर्वांचे लक्ष होते. अखेर मिरा भाईंदर-वसई-विरार आयुक्तालयाच्या पोलिस उपायुक्त परिमंडळ २ आणि परिमंडळ ३तर्फे वसई आणि विरार क्षेत्रातील पर्यटन स्थळांच्या सभोवताली १०० मीटर परिसरात प्रतिबंधात्मक आदेश म्हणजेच बंदी आदेश लागू करण्याबाबत परिपत्रक काढण्यात आले आहे.
अमरावतीत खळबळ! भररस्त्यात ऑन ड्युटी पोलिस अधिकाऱ्याला संपवलं, तीन आरोपी अटकेत, काय घडलं?
यामध्ये समुद्र किनारे, धरण, तलाव, धबधबे, वाहणाऱ्या नद्या या प्रवाहाच्या पाण्यात उतरणे आणि पोहण्यास बंदी घालण्यात आली आहे. तसेच पर्यटन स्थळांपैकी पावसामुळे धोकादायक झालेल्ल्या ठिकाणी सेल्फी काढणे, मद्यपान करणे, मद्य वाहतूक करणे, वाहतुकीचे रस्ते तसेच धोकादायक ठिकाणी वाहने थांबवणे, वाहन अतिवेगाने चालवणे, वाहतुकीचे नियम पाळणे, सार्वजनिक ठिकाणी खाद्यपदार्थ, कचरा इत्यादी साहित्य फेकणे यासाठी प्रतिबंध करण्यात आला आहे. तर पर्यटन स्थळी अथवा सार्वजनिक ठिकाणी महिलांची छेड काढणे, महिलांशी असभ्य वर्तन, अश्लील हावभाव करणे, मोठ्या आवाजात संगीत यंत्रणा वाजवणे आणि कोणत्याही प्रकारचे प्रदूषण करणे या कृतींचा देखील या आदेशामध्ये समावेश करण्यात आला आहे. यासाठी नागरिकांनी आणि पर्यटकांनी या आदेशाचे पालन करावे अन्यथा कारवाई करण्यात येईल, असा इशारा पोलिस आयुक्तालयाच्या परिमंडळ २ आणि परिमंडळ ३तर्फे देण्यात आला आहे.
उत्तराखंडमध्ये पावसाचा कहर! चारधाम यात्रा २४ तासांसाठी स्थगित, ‘या’ जिल्ह्यांत रेड अलर्ट जारी
वनविभागाचेही आदेश
पावसाळ्यात वसईच्या तुंगारेश्वर हे ठिकाण म्हणजे हिरवागार परिसर असल्याने पर्यटकांचे आकर्षण असते. वर्षा सहलीबरोबरच जंगल सफरीचा अनुभव मिळत असल्याने अनेक सर्वच हौशी पर्यटक, बायकर, छायाचित्रकार, पक्षी-प्राणी प्रेमी आणि निसर्गप्रेमी हजारोच्या संख्येने येथे येत असतात. तर तुंगारेश्वर प्रमाणे चिंचोटी येथे देखील मोठ्या प्रमाणावर पर्यटकांची गर्दी असते. पावसाळ्यात तुंगारेश्वर येथील नैसर्गिक धबधब्यानजीक असलेल्या दगडांवर मोठ्या प्रमाणावर मळी साचलेली असते. त्यामुळे एखाद्यावेळी येथून पाय घसरून पाण्यात पडण्याची शक्यता नाकारता येणारी नाही. त्यामुळे पावसाळ्यात होणाऱ्या दुर्घटना लक्षात घेता वनविभागातर्फे या भागातील धबधबे आणि झरे या पाण्याच्या प्रवाहात उतरण्यास आणि धबधबे ठिकाणी जाण्यास बंदी जाहीर करण्यात आली आहे. बंदी आदेश मोडून प्रतिबंधात्मक भागात प्रवेश केल्यास कारवाई करण्यात येणार असल्याचे तुंगारेश्वर वनपरिक्षेत्र अधिकारी राजेश्री साळवी यांनी सांगितले.