काय म्हणाले धनंजय मुंडे?
आमदार धनंजय मुंडे म्हणाले की, “गुन्हा दाखल झाल्यानंतरही संदीप क्षीरसागर हे संबंधित आरोपींसोबत होते, हे पोलिस तपासातून स्पष्ट होणे आवश्यक आहे.” त्यांनी पोलिस तपासावरही गंभीर शंका उपस्थित करत म्हटलं, “सध्या सुरू असलेला तपास फारसा विश्वासार्ह वाटत नाही. त्यामुळे या संपूर्ण प्रकरणाची एसआयटीमार्फत चौकशी व्हावी, अशी मी मुख्यमंत्री एकनाथ शिंदे यांच्याकडे मागणी करणार आहे.”

पीडित कुटुंबियांची घेतली भेट
मुंडेंनी या मुलीच्या वडिलांची भेट घेतली असून, त्यांच्या व्यथेमुळे ते व्यथित झाल्याचे त्यांनी सांगितले. “एका वडिलांच्या डोळ्यातील अश्रू आणि असहायता पाहून माझा संताप अनावर झाला,” असं ते म्हणाले. त्यांनी असा दावा केला की, आरोपी पवार याने अनेक छोटे कोचिंग क्लासेस बंद पाडले आणि पालकांवर दबाव टाकण्यासाठी आपले लोक पाठवले. विशेष म्हणजे, या आरोपींच्या मोबाईलचे सीडीआर तपासून, त्यांच्याशी संबंधित राजकीय पाठबळ असलेल्या लोकांची नावे समोर यावीत, अशीही मागणी त्यांनी केली.

संदीप क्षीरसागर यांच्यावर आरोप?
“शिवजयंती कार्यक्रमाचा अध्यक्ष म्हणून अशा लोकांना संदीप क्षीरसागर निवडतात, ही बाबही चिंताजनक आहे,” असा टोलाही त्यांनी लगावला. पवार याच्या शाळेची इमारत रेड झोनमध्ये बांधली जात असल्याचा मुद्दा उपस्थित करून त्यांनी प्रशासन आणि संबंधित लोकप्रतिनिधींवर प्रश्न उपस्थित केले.

एसपींवर काय बोलले धनंजय मुंडे ?
मुंडे यांनी स्पष्ट शब्दांत म्हटलं की, “ही अटक नव्हे, तर आरोपीने सरेंडर केलं आहे. जेव्हा एखाद्या घटनेवरून कोणाचे मंत्रिपद काढायचे असते तेव्हा गोंगाट होतो, पण आज बीडमध्ये एक अल्पवयीन मुलगी न्यायासाठी झगडते आहे, तरीही कोणीच बोलत नाही.”या प्रकरणाची गांभीर्याने दखल घेऊन, महिला अधिकाऱ्यांच्या नेतृत्वाखाली स्वतंत्र तपास यंत्रणा नेमावी, अशी ठाम भूमिका त्यांनी घेतली आहे.