आझाद मैदानावरील आंदोलनात मनसे नेते नितीन सरदेसाई आणि काँग्रेसचे नेतेदेखील सहभागी झाले आहेत. आझाद मैदान परिसरात मोठी गर्दी झालेली बघायला मिळत आहे. सर्वपक्षीय नेते, कलाकार असे अनेक मंडळी या आंदोलनात सहभागी झाले आहेत. यावेळी हिंदी भाषा सक्तीच्या शासन निर्णयाची होळी करण्यात आली. उद्धव ठाकरे यांनी हिंदीसक्तीच्या जीआरची होळी केली. यावेळी त्यांनी माध्यमांना देखील प्रतिक्रिया दिली.

‘आम्ही हिंदीची सक्ती लादू देणार नाहीत’, ठाकरेंची भूमिका

“आम्ही दबाव आणू इच्छित नाहीत. आम्ही हे स्वीकारतच नाहीयत. ते एखादी गोष्ट लादणार असतील तर आम्ही आमच्या वतीने तो विषय संपवला आहे. आम्ही त्या जीआरची होळी केली आहे. त्यामुळे तो जीआर आहे असं मानण्याचं कारण नाही. आम्ही हिंदीची सक्ती लादू देणार नाहीत”, असं उद्धव ठाकरे म्हणाले.

“अजित पवार म्हणाले की, मोर्चा काढण्याची वेळ येऊ देणार नाहीत. ही आनंदाची गोष्ट आहे. कोणीतरी एक धाडस दाखवत आहे. सर्वचजण गुलाम झालेले नाहीत. त्याबद्दल कौतुक आहे. मोर्चा कशासाठी काढावा लागतोय? हे त्यांच्या लक्षात आलेलं नाही. महाराष्ट्रात मराठी भाषेवर जो अन्याय होतोय त्यासाठी हा मोर्चा निघतोय. सगळ्यांची मुलं त्या वयात मुलं मोठी होत असतात. त्यांच्यावर त्या वयात किती भार टाकणार? हा सुद्धा महत्त्वाचा विषय आहे”, अशी भावना उद्धव ठाकरे यांनी मांडली.

“आम्ही त्यावेळेला अभ्यास केला. पण त्या अभ्यासाचं काय झालं हे कुणी सांगत नाहीय. कुणी अभ्यास न करता हा निर्णय अचानक लादला का गेला? कुणी लादला हे सुद्धा अजित पवारांनी जाहीर केलं तर बरं होईल”, असं उद्धव ठाकरे म्हणाले. यावेळी पत्रकारांनी उद्धव ठाकरेंना 5 तारखेचा मोर्चा भव्य होईल का? असं विचारलं, त्यावर “येत्या 5 जुलैचा मोर्चा हा भव्य नाही. तर महाभव्य मोर्चा असेल”, असं सूचक वक्तव्य उद्धव ठाकरे यांनी केलं.