राज्याच्या मुख्य सचिव सुजाता सौनिक यांनी याबाबत महत्त्वाचं परिपत्रक देखील जारी केलं आहे. महाराष्ट्र राज्याच्या मंत्रिमंडळाच्या सदस्यांचा शपथविधी समारंभ आयोजित केल्याची माहिती या परिपत्रकात जारी करण्यात आली आहे. मुंबईत राजभवन येथे हा शपथविधीचा कार्यक्रम पार पडणार आहे. या कार्यक्रमाचं मोजक्याच जणांना निमंत्रण असणार असल्याची देखील माहिती समोर येत आहे.

छगन भुजबळांना कोणतं खातं मिळणार?

महाराष्ट्र विधानसभा निवडणुकीनंतर छगन भुजबळ यांना मंत्रिमंडळातून डावलण्यात आलं होतं. त्यामुळे राजकीय वर्तुळात विविध चर्चांना उधाण आलं होतं. स्वत: भुजबळांनी नाराजी व्यक्त केली होती. या दरम्यान, भुजबळ आणि उपमुख्यमंत्री अजित पवार यांच्यात दुरावा आल्याची चर्चा राजकीय वर्तुळात सुरु होती. मधल्या काही काळात भुजबळ ज्येष्ठ नेते शरद पवारांच्या नेतृत्वातील राष्ट्रवादी काँग्रेस पक्षात प्रवेश करतील की काय, अशी देखील चर्चा होती. पण नंतर काही दिवसांपूर्वी छगन भुजबळ यांचं अजित पवार यांच्यासोबत मनोमिलन झाल्याची देखील माहिती समोर आली. अखेर अजित पवारांनी भुजबळांना मंत्रिमंडळात स्थान देवून त्यांची नाराजी दूर करण्याचा प्रयत्न केला आहे. भुजबळ सकाळी 10 वाजता मंत्रिपदाची शपथ घेणार आहेत.

काही दिवसांपूर्वी राष्ट्रवादीचे नेते धनंजय मुंडे यांनी मंत्रिपदाचा राजीनामा दिला होता. त्यामुळे मंत्रिमंडळात एक जागा रिक्त झाली होती. याच जागेवर आता छगन भुजबळांची नियुक्ती होणार आहे. तसेच भुजबळांना पुन्हा एकदा अन्न आणि नागरी पुरवठा खातं मिळण्याची शक्यता आहे. याबाबत उद्या काय-काय घडामोडी घडतात? ते पाहणं महत्त्वाचं आहे. उद्या महाराष्ट्राच्या राजकारणात आणखी काही अनपेक्षित राजकीय घडामोडी बघायला मिळतात का? ते देखील पाहणं महत्त्वाचं आहे.