नाशिक-अजय मुंढे

चौदावर्षीय अल्पवयीन मुलीला प्रेमाच्या जाळ्यात ओढून इन्स्टाग्रामवर नग्नावस्थेत व्हिडीओ कॉल करण्यास प्रवृत्त करून तिचे नग्न फोटो काढून ब्लॅकमेल करणाऱ्या तिघांनी या अल्पवयीन मुलीकडून साडेसात लाख रुपयांची रक्कम उकळल्याचा धक्कादायक प्रकार नाशिकरोड पोलिस ठाण्याच्या हद्दीत घडला. यातील तिघा संशयितात बहीण भावाचादेखील समावेश असून, पीडित अल्पवयीन मुलीने दिलेल्या फिर्यादीवरून तिघाही संशयितांच्या विरोधात पॉक्सो कायद्यांतर्गत गुन्हा दाखल झाला आहे.पीडित अल्पवयीन मुलगी सध्या शहरातील एका इंग्रजी माध्यमाच्या शाळेत इयत्ता दहावीच्या वर्गात शिक्षण घेते. २०२३ मध्ये परीक्षेच्या वेळी तिची ओळख शाळेतील इयत्ता आठवीच्या वर्गात शिक्षण घेणाऱ्या दोन विद्यार्थ्यांशी झाली. हे दोघे बागवानपुरा आणि दूधबाजार येथील आहेत. यापैकी एकाने पीडित मुलीशी मैत्री करून फोनवर बोलण्यासाठी इन्स्टाग्रामवर अकाउंट सुरू करण्यास सांगितले. पीडितेने घरात वडिलांचा जुना मोबाइल दुरुस्त करून घेतला. संशयिताने इन्स्टाग्रामवर अकाऊंट सुरू करून दिले. त्याद्वारे संशयित पीडितेशी बोलत होते.

संशयित विद्यार्थ्यांनी पीडितेला प्रेमाच्या जाळ्यात अडकवले. त्यातून तिने घरातील लॉकरमधून परस्पर पैसे काढून घेत महागडा फोनही घेतला. दोघा संशयितांपैकी एकाने पीडितेला व्हिडीओ कॉल करून कपडे काढण्यास प्रवृत्त केले.यादरम्यान संशयित विद्यार्थ्याने व्हिडीओचे स्क्रीनशॉट काढून त्याचे फोटो काढले. त्यानंतर पीडितेकडे त्याने पैशांची मागणी केली असता तिने आई वडिलांच्या लॉकरमधून १० हजार रुपये काढून दिले. त्याने वेळोवेळी पैशांची मागणी केल्याने तिने नकार देताच त्यान तिचे नग्न फोटो व्हायरल करण्याची धमकी दिली. भीतीपोटी मुलीने संशयिताला ५ ते ६ लाख रुपये दिले.दुसऱ्या मुलाला कळताच त्यानेही मुलीची भेट घेऊन तिच्याकडून ६० ते ७० हजार रुपयांची रक्कम उकळली. सशयिताच्या बहिणीला या प्रकाराची माहिती समजताच तिनेही या मुलीला ब्लॅकमेल करून तिच्याकडून ७ हजार रुपये उकळले. चार दिवसांपूर्वी मुलीच्या आईच्या हाती तिचा अॅपल फोन लागल्याने या गंभीर प्रकरणाला वाचा फुटली.