स्टेशनच्या नावाचा इतिहास काय?
मुंबईतील वांद्रे परिसरला बांद्रा असेही म्हटले जाते. बांद्रा हे नाव फारसी आणि उर्दू भाषांमधून आलं आहे. याचा अर्थ ‘बंदरगाह’ म्हणजे पोर्ट आहे. मराठीमध्ये याला ‘बंदर ‘ म्हणतात. यावरुनच वांद्रे नावाचा संबंध हा बंदरगाह म्हणजेच बंदराशी आहे. म्हणजे बांद्राचा ‘बंदर’ म्हणजे वानरांशी काहीही संबंध नाही. एकेकाळी बांद्रा हे एक बंदर होतं. बाराव्या शतकात येथे मच्छीमार आणि शेतकरी राहत होते. आज हे ठिकाण पश्चिम मुंबईमध्ये आहे. एकेकाळी हे मच्छीमारांचे गाव होते, पण आता ते महाराष्ट्रातील मोठं व्यावसायिक केंद्र बनलं आहे.

बांद्रा किल्ल्याचा इतिहास
बांद्रा फोर्ट म्हणजे बांद्रा किल्ला खूप प्रसिद्ध आहे. या किल्ल्याला ‘कॅस्टेला दे अगुआडा’ असंही म्हणतात. हा किल्ला 1640 मध्ये पोर्तुगीजांनी समुद्राच्या किनारी बांधला. इंग्रजांच्या राजवटीपूर्वी हा भाग पोर्तुगीजांच्या ताब्यात होता. पूर्वी या किल्ल्याचा उपयोग मुंबईच्या बंदरात प्रवेश करण्यासाठी चेकपोईंट म्हणून केला जात होता. पण आता हे मुंबईकरांसाठी पिकनिक स्पोट बनला आहे. येथे अनेक चित्रपटांचे शुटिंग देखील होतात.

वरळी सी लिंक, माउंट मेरी चर्च
याच भागात प्रसिद्ध ‘वरळी सी लिंक’ आहे. हा पूल समुद्रावर बांधलेला आहे. अनेक सिरिअल अनेक चित्रपटांमध्ये हा सी लिंक मुंबईची ओळख म्हणून दाखवला जातो. हा पूल बांद्र्याला वरळीशी जोडतो. या सी लिंकवरुन प्रवास करताना मुंबई शहराचा नयनरम्य दृश्य पाहता येते. मुंबईतील प्रसिद्ध चर्च ‘बासिलिका ऑफ अवर लेडी ऑफ द माउंट’ सुद्धा इथेच आहे. याला माउंट मेरी चर्च म्हणून ओळखलं जातं. माउंट मेरीच्या जत्रेला असंख्य मुंबईकर जातात.

बांद्रा पूर्व
बांद्र्याच्या पुर्वेकडे शासकीय कर्मचाऱ्यांची वसाहत आहे. कलानगर परिसरात ठाकरे परिवाराचे मातोश्री हे निवासस्थान आहे. बांद्रा कुर्ला कॉम्प्लेक्स आहे. जे मुंबई शहरातील आणि देशातील प्रमुख व्यापारी केंद्र आहेत. अनेक मोठ्या कंपन्यांची मुख्यालये या परिसरात आहेत.

स्टार्सची घरे, चाहत्यांची गर्दी
बॉलीवूडचे चाहते बांद्र्याला नक्कीच भेट देतात. बांद्र्याच्या पश्चिमेला समुद्रालगत अनेक बॉलीवूड स्टार्सची घरे असल्याने त्यांचे त्यांची एक झलक पाहण्यासाठी चाहते येतात. अनेक वेळा स्टार्स आपल्या घराबाहेर येऊन चाहत्यांना अभिवादन करतात. बांद्रा मध्ये शाहरुख खान, आमिर खान, सलमान खान यांच्यासह अनेक कलाकारांची घरे आहेत.