कसारा जवळील फुगाळे गावातील आघानवाडी गावात एका डोंगरावर आकाशात उडणारा ड्रोन अचानक खाली कोसळला. त्यामुळे डोंगरावर खेळत असणाऱ्या मुलांमध्ये एकच घबराट उडाली. गुरुवारी दुपारी 2 च्या सुमारास आघानवाडीतील लहान मुलं डोंगरावर खेळत होते. अचानक आकाशातून मोठा आवाज करत, हवेत घिरट्या घालणारा मोठा ड्रोन एका झाडावर पडला. ड्रोनचा मोठा आवाज येत असल्याने खेळणाऱ्या मुलांनी घटनास्थळी धाव घेतली. मुलांना या ड्रोनबाबत कुतूहल वाटल्याने त्यांनी विमान पडले, विमान पडले अशी आरडाओरड केली. त्यांनी झाडावर पडलेले विमान झाडावरून खाली उतरवले. यानंतर ते विमान डोंगराच्या खाली वस्तीजवळ आणले. गावाचे सरपंच जिवा भला यांनी याबाबत तात्काळ कसारा पोलीस ठाण्याशी संपर्क करून त्यांना माहिती दिली.
Dharashiv News : तुळजाभवानी मंदिरात 12 पुजाऱ्यांना प्रवेशबंदी, नेमकं कारण काय?
कसारा पोलिसांनी घटनास्थळी धाव घेत माहिती घेतली असता सदर ड्रोन एका सर्व्हेसाठी उडवण्यात आलं होतं, अशी माहिती समोर आली. मिळालेल्या माहितीनुसार, जलसंपदा विभागाचा वाडा तालुक्यात सर्व्हे सुरु होता, अशी माहिती पोलिसांना मिळाली. पायोनियर इन्फ्रा या ठेकेदार कंपनीने ड्रोनच्या मदतीने सर्व्हे सुरु केला होता. सर्व्हे सुरु असताना ड्रोनची दिशा भरकटल्याने सदर ड्रोन शहापूर तालुक्यातील फुगाळे आघानवाडी येते डोंगरावरील एका झाडावर पडला असल्याची माहिती ठेकेदार कंपनीने कसारा पोलिसांना दिली आहे.

संपूर्ण शहापूर तालुक्यात खळबळ

दरम्यान, देशावर युद्धाचे सावट होते. ते आता कुठे तरी थांबले असताना पुन्हा काही कुरापती सुरु झाल्या का? असा संशय अनेक तालुकावासियांनी व्यक्त केला. पण वाडा तालुक्यात होऊ घातलेल्या धरणाचा सर्व्हे सुरु असल्याची खात्री पटताच तालुकावासियांनी सुटकेचा श्वास सोडला.