महाराष्ट्र संघटित गुन्हेगारी नियंत्रण कायद्याअंतर्गत (मकोका) कारवाई करण्यात आलेला कुख्यात गजानन ऊर्फ गजा मारणेला येरवडा कारागृहातून सांगली कारागृहात घेऊन जाताना पोलिसांसमक्ष एका ढाब्यावर मारणे आणि त्याच्या साथीदारांची ‘मटण पार्टी’ झाल्याचा धक्कादायक प्रकार समोर आला आहे. या प्रकाराची गंभीर दखल पोलिस आयुक्त अमितेशकुमार यांनी घेतली असून, त्या ठिकाणी उपस्थित असणाऱ्या एक सहायक निरीक्षकासह चार पोलिस अंमलदारांचे निलंबन करण्याचा निर्णय आयुक्तांनी घेतला आहे.
Pune Crime : शांत चेहऱ्यामागे वादळ दडलेलं, पुण्यातील कष्टाळू दाम्पत्याने आयुष्य संपवलं, हादरवणारं कारण समोर
कोथरूडमधील एका तरुणाला मारहाण केल्याप्रकरणी मारणेसह अन्य काही जणांवर गुन्हा दाखल करण्यात आला आहे. या प्रकरणात मारणे टोळीवर ‘मकोका’ लावण्यात आला आहे. ते सर्व आरोपी सध्या येरवडा कारागृहात आहेत. मात्र, पुणे पोलिसांनी एक महिन्यापूर्वी मारणे याला सांगली कारागृहात स्थलांतरित करण्याचा निर्णय घेतला होता. त्यानुसार गुन्हे शाखेचे एक पथक त्याला बंदोबस्तात सांगलीला घेऊन चालले होते. त्या वेळी हा धक्कादायक प्रकार घडला.
Pune Accident : जुन्या मुंबई-पुणे हायवेवर कंटेनरने चिरडलं, वाढदिवसाच्या आदल्या रात्री कर्तव्यदक्ष पोलिसाचा करुण अंत
पोलिसांची वाहने पुण्यातून बाहेर पडताच त्यांचा दोन ‘फॉर्च्युनर’, एक ‘थार’ आणि अन्य एका गाडीने पाठलाग सुरू केला. पोलिस साताऱ्यात आल्यानंतर महामार्गावरील एका प्रसिद्ध ढाब्यावर थांबले. धाब्यावर कर्मचाऱ्यांनी जेवण केले. त्या वेळी पोलिसांच्या पाठीमागून चार वाहनांतून आलेल्या व्यक्तीही तेथे दाखल झाल्या. त्या व्यक्ती मारणेचे समर्थक, कार्यकर्ते असल्याचे स्पष्ट झाले. त्यामध्ये पोलिस रेकॉर्डवरील काही सराईत गुन्हेगारांचाही समावेश होता.

एकीकडे पोलिसांचे जेवण सुरू असताना, त्याच्या समर्थकांनी मारणेची भेट घेतली. ढाब्यातून त्याला मटण प्लेट दिली. त्यांनी तिथे जेवण केले. हा सर्व प्रकार सीसीटीव्हीत कैद झाला असून, हा प्रकार पोलिस आयुक्तांना समजला. त्यांनी संबंधित ढाब्यावरील सीसीटीव्ही तपासण्याचा आदेश दिला. त्यात सर्व प्रकार उघडकीस आला. चौकशीनंतर संबंधित पोलिस अधिकारी आणि कर्मचाऱ्यांचे निलंबन करण्याचा आदेश दिला आहे.

ढाब्यावर भेटलेल्यांवर गुन्हे दाखल

गजा मारणेला ढाब्यावर भेटलेल्यांपैकी तिघांवर गंभीर गुन्हे दाखल आहेत. त्यांच्यावरदेखील आता गुन्हा दाखल करण्यात आला असून, गुन्हे शाखेचे पथक त्यांच्या मागावर आहे. सतीश शिळीमकर, विशाल धुमाळ तसेच बाळकृष्ण ऊर्फ पांड्या मोहिते अशी गजा मारणेला ढाब्यावर भेटलेल्यांची नावे आहेत. विशाल धुमाळ याच्यावर खुनाचा गुन्हा नोंद आहे, तर पांड्या मोहिते हा सांगलीतील गजा मारणेचा ‘शूटर’ आहे. तो सांगलीत गजा मारणेच्या टोळीचे वर्चस्व सांभळण्याचे काम करतो. दरम्यान, पोलिसांनी त्यांची वाहने ताब्यात घेतली आहेत.